3 ބިލިޔަން ރުފިޔާއާއި ގާތްކުރާ އަދަދަކަށް ޓްރެޜަރީ ބިލް (ޓީ-ބިލް) ވިއްކުމަށް މާލީ ވުޒާރާއިން ހުޅުވާލައިފިއެވެ. 

3.50 ޕަސެންޓާއި 4.60 ޕަސެންޓާ ދެމެދުގެ އިންޓްރެސްޓް ރޭޓެއްގައި ވިއްކުމަށް އެ ވުޒާރާއިން ހުޅުވާލި ޓީ-ބިލް ތަކުގެ ތެރޭގައި ހިމެނެނީ، 103 ދުވަހުން އަނބުރާ ދެއްކުމަށް ވިއްކާ 165 މިލިއަން ރުފިޔާގެ ޓީބިލަކާއި 27 ދުވަހުން އަނބުރާ ދައްކަން ޖެހޭ 1.8 ބިލިޔަން ރުފިޔާގެ ޓީބިލެެއްގެ އިތުރުން 363 ދުވަހުން އަނބުރާ ދެއްކުމަށް 829.9 މިލިއަން ރުފިޔާގެ ޓީ-ބިލެއްގެ އިތުރުން 181 ދުވަހުން އަނބުރާ ދެއްކުމަށް 119 މިލިއަން ރުފިޔާގެ ޓީ-ބިލެކެވެ. 

އެގޮތުން ޖުމުލަ 2.9 ބިލިޔަން ރުފިޔާގެ ޓީބިލް ވިއްކާލުމަށް މިހާރު ހުޅުވާލާފައިވާނެ ކަމުގައި އެ ވުޒާރާއިން ހާމަކުރެއެވެ. 

Advertisement

ޓީ-ބިލް ގަންނަނީ ކޮމާޝަލް ބޭންކުތަކާއި ސަރުކާރު ހިއްސާވާ ކުންފުނިތަކާއި އިންވެސްޓްމަންޓް ފަންޑުތަކާއި ޕްރައިވެޓް ކުންފުނިތަކާއި އަދި ޕްރައިވެޓް ޕްލޭސްމަންޓް އުސޫލުންނެވެ.

ޓީ-ބިލްއަކީ ގަވަރުމަންޓް ސެކިއުރިޓީޒްގެ ތެރޭގައި ހިމެނޭ ކުރު މުއްދަތުގެ ސެކިއުރިޓީޒް އެވެ. ރާއްޖޭގެ ސަރުކާރުން ދޫކުރާ ޓީބިލަކީ ދިވެހި ރުފިޔާ އިން ޑިސްކައުންޓް އަގެއްގައި ވިއްކުމަށް ހުށަހަޅައި މުއްދަތު ހަމަވުމުން ފޭސް ވެލިއު (މޫނުމަތީ އަގު) އަދާކުރާ ގޮތަށް ނަގާ ފައިސާއެވެ.