އަހަރީ ފީ ދައްކަން ނުޖެހޭގޮތަށް ވަކި ވަކި ފަރުދުންނަށް ކުންފުނި ހެދޭގޮތަށް އެކުލަވާ ކުންފުންޏާއި ބެހޭ ބިލު ރައީސުލްޖުމްހޫރިއްޔާ ޑރ މުހައްމަދު މުޢިއްޒު ތަޝްދީގު ކުރައްވައިފިއެވެ.

ރާއްޖޭގައި ކުންފުނި އުފެއްދުމާއި ހިންގުމަށް ބޮޑެތި ބަދަލުތަކެއް އަންނާނެހެން މި މަހުގެ 6 ވަނަ ދުވަހު ރައްޔިތުންގެ މަޖިލިހުން ފާސްކުރި ކުންފުންޏާ ބެހޭ ބިލު މިއަދު ރައީސް މިއަދު ތަޝްދީގު ކުރެއްވުމާއެކު އެ އުސޫލުވަނީ ޤާނޫނަކަށް ބަދަލުވެފައެވެ. 

2024 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން އަމަލުކުރަން ފަށާ މި ބިލަކީ ވެރިކަމާއި ހަވާލުވެ ވަޑައިގެން ފަށުން ރައީސް ޑރ މުއިއްޒު ތަޝްދީގު ކުރެއްވި ފުރަތަމަ ބިލުވެސްމެއެވެ. 

ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ފާސްކުރުމަށް މަޖިލީހަށް ފޮނުވި އެ ބިލު ގާނޫނަކަށް ވުމުން އަންނާނެ އެންމެ ބޮޑު ބަދަލަކީ ވަކި އެންމެ ފަރުދަކަށްވެސް ވެސް ކުންފުނި އުފެއްދުމަށް ޖާގަ ތަނަވަސް ވުމެވެ.

ކުރިން އޮންނަ ގޮތުން ކުންފުންޏެއް ހަދާ ނަމަ އެކަކަށް ވުރެ ގިނަ މީހުން ހިއްސާދާރުންގެ ގޮތުގައި ތިބެން ޖެހެއެވެ. ނޫން ނަމަ ޖެހޭނީ ސޯލް ޕްރޮޕޮރައިޓްޝިޕެއްގެ ގޮތުގައި ވިޔަފާރި ރަޖިސްޓްރީ ކުރާށެވެ.

މީގެ އިތުރަށް ކުންފުނީގެ އެކި ބާވަތްތައް އެކަށައަޅާ ގާނޫނުތަކުގެ ގޮތުގައި އެ ބިލުގައި ހިމަނައިފައިވާ ކަންތައްތަކުގެ ތެރޭގައި، ރައީސުލްޖުމްހޫރިއްޔާގެ ގަރާރެއްގެ ދަށުން އުފައްދާ ކުންފުނިތައް ވެސް ރަސްމީކޮށް މިނިސްޓްރީގައި ކުންފުންޏެއްގެ ގޮތުގައި ރަޖިސްޓްރީކުރުމާއި ރައްޖޭގައި ރަޖިސްޓްރީކޮށްގެން ހިންގާ ފޮރިން އިންވެސްޓްމަންޓްތަކަށް ވެސް ވަކި ހާއްސަ ކްލެސިފައިޑް ނަމްބަރެއް ދިނުމާއި އާންމު ކުންފުނިތައް ވެސް ފަސޭހައިން އެނގޭ ގޮތަށް ނަމްބަރު ކުރުން ހިމެނެއެވެ. 

އަދި ކުންފުނި ރަޖިސްޓްރީ ކުރާއިރު ކުންފުނިން ހިންގާނެ ވިޔަފާރިތައް ކްލެސިފައި ކުރުމުގެ ބަދަލުގައި އަސާސީ ގަވާއިދުގައި އެ ކަންކަން ހިމަނައި ބޯޑުން ފާސްކުރާ ކަންކަމުގެ ގޮތުގައި ބަދަލުކުރުމުގެ އިތުރުން ކުންފުނީގެ ރަޖިސްޓްރީ ކުރާ އެޑްރެހުގެ އިތުރަށް ލިޔެކިޔުން ފޮނުވާނެ ސާވިސް އެޑްރެސްއެއް ހުރުން މި އުސޫލުގެ ދަށުން ލާޒިމްކުރެއެވެ. 

ގާނޫނުގައި ހިމަނާފައި ވާ އަނެއް މުހިންމު ބަދަލަކީ ކުންފުނިތަކުން އަހަރީ ފީ ދައްކަން ނުޖެހޭ ގޮތް ހެދުމެވެ. މިހާރު ކުންފުނިތަކުގެ އަހަރީ ފީގެ ގޮތުގައި 2،000ރ. ދައްކަން ޖެހެއެވެ. އެ ފީ ކަނޑާލަން ހުށަހެޅި ސަބަބަކީ އަހަރީ ފީ ނުދައްކާ ކުންފުނިތައް ގިނަވެފައިވުމެވެ.