ޚިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަށް ހުރަސްނޭޅުމަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ. 

މި މައްސަލަ ހުށަހަޅުއްވާފައިވަނީ ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އަބްދުالله ޝަފީގެވެ. 

ޝަފީގުގެ މައްސަލާގައި އޭނާ ވަނީ، މިނިވަންކަމާއި އެކު ފިކުރު ކުރުމާއި، އިސްލާމްދީނުގެ އަސްލަކާއި ޚިލާފް ނުވާ ގޮތެއްގެ މަތީން އެމީހެއްގެ ބުއްދިއަށް ފެންނަ ގޮތްތަކާއި ޚިޔާލުތައް ދުލާއި ގަލަމުން އަދި އެނޫންވެސް ގޮތްގޮތަށް ފާޅުކުރުމުގެ މިނިވަންކަން ކޮންމެ މީހަކަށްވެސް ލިބިފައިވާކަން ގާނޫނު އަސާސީގެ 27 ވަނަ މާއްދާގައި ބަޔާންކޮށްފައިވާކަން ފާހަގަކުރައްވާފައެވެ. 

އަދި ހަމަ އެހެންމެ، ގާނޫނު އަސާސީގެ 28 ވަނަ މާއްދާއިން، ނޫސްވެރިކަން ކުރުމާއި، މުވާސަލާތީ ވަސީލަތްތައް ބޭނުން ކުރުމުގެ މިނިވަންކަން ކޮންމެ މީހަކަށްވެސް ދީފައިވާކަމަށް އޭނާ ވިދާޅުވި އެވެ. 

ކަންމިހެން ހުރި ނަމަވެސް، އޮންލައިންކޮށް، ރާއްޖޭގައި ހިންގަމުން އަންނަ ވެބްސައިޓް ތަކަށް ނުވަދެވޭ ގޮތަށް ސަރުކާރުން އެ ވެބްސައިޓްތައް ބްލޮކް ކުރަމުންދާކަން ފާހަގަކޮށް ޝަފީގު ވަނީ ސަރުކާރުގެ އެ އަމަލަކީ ގާނޫނު އަސާސީއާއި ޚިލާފް ޢަމަލެއް ކަމަށް ވިދާޅުވެފައެވެ. 

ޝަފީގު ވިދާޅުވީ، ސަރުކާރުގެ އެ ޢަމަލަކީ ނޫސްވެރިކަންނާއި، ނޫސް މަޖައްލާތައް އަދި ދިވެހިރައްޔިތުންނަށް ވެސް ދިން އިންޒާރެއް ކަމަށެވެ. އަދި އެ ޢަމަލު އޭނާ ސިފަކުރެއްވީ ޑިމޮކްރަސީ އާއި ބީރަށްޓެހި ޢަމަލެއްގެ ގޮތުގައެވެ. 

އެހެންކަމުން، ޝަފީގުވަނީ އެފަދައިން ނޫސް މަޖައްލާތައް ބްލޮކް ކުރުން ހުއްޓާލުމަށް ސަރުކާރަށް ގޮވާލާފައެވެ.

މި މައްސަލަ މަޖިލީހަށް ހާޒިރުވެވަޑައިގެން ތިއްބެވި 30 މެންބަރުންގެ ތާއީދާއެކު މަޖިލީހަށް ވަނީ ބަލައިގެންފަ އެވެ. މައްސަލަ ބަލައިގަންނަން ނުފެންނަ ކަމަށް ވޯޓު ދެއްވީ ދެ މެންބަރުންނެވެ.