އިސްލާމީ ރިސާލަތު ފޯރުކޮށްދިނުމުގައި ޒަމާނީ ވަސީލަތްތަކާއި ޓެކްނޮލޮޖީގެ ބޭނުންކުރުމަކީ ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ ތަޞައްވުރުގައި ހިމެނޭ ކަމެއްކަމަށް އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އިސްލާމީ މަރުކަޒުގެ ފަންގިފިލާތަކުގައި ޓީވީ ބެހެއްޓި ޚަޠީބު ފެންނަ ގޮތައް އިންތިޒާމު ކުރެވި، މިއަދު ހުތުބާ ކިޔަމުން ދިޔައިރު، އެންމެނަށްވެސް ޚަތީބު ފެންނަގޮތް ވަނީ ހަދާފައެވެ.
މިކަމާއި ގުޅިގެން ޝަހީމް އެކްސްގައި ކުރެއްވި ޕޯސްޓެއްގައި ވަނީ، މި މަޝްރޫޢު އަށް ސްޕޮންސަރ ކުރެއްވި ކަމަށްޓަކައި ދިރާގަށް ޝުކުރު އަދާކުރައްވާފައެވެ.
އަދި ސަރުކަރުގެ އަމާޒަކީ ހުރިހައި ބޮޑެތި މިސްކިތްތަކުގައި އެ އިންތިޒާމުކުރުން ކަމަށް ޝަހީމް ވިދާޅުވި އެވެ.
"އިސްލާމީ ރިސާލަތު ފޯރުކޮށްދިނުމުގައި ޒަމާނީ ވަސީލަތްތަކާއި ޓެކްނޮލޮޖީގެ ބޭނުންކުރުމަކީ ރައީސް ޑރ މުއިއްޒުގެ ތަޞައްވުރުގައި ހިމެނޭ ކަމެއްކަމަށްވާތީ، މިނިސްޓްރީ އިން މަސައްކަތްކުރާނީ އެ ތަޞައްވުރު ހަގީގަތަކަށް ހެދުމަށް." ޝަހީމް ވިދާޅުވި އެވެ.
މީގެ ކުރިން ޝަހީމް ކުރެއްވި ޓްވީޓެއްގައި ވަނީ، ނުކުޅެދުންތެރިކަން ހުންނަ ފަރާތްތަކަށް އެހީވުމަށް އިޝާރާތުގެ ބަހުން ޚުތުބާ ޓީވީން ފެންނަ ގޮތްވެސް ވަރަށް އަވަހަށް ހައްދަވާ ދެއްވާނެ ކަމަށް ވިދާޅުވެފައެވެ.
އަދި އިނގިރޭސި ބަހުންނާއި އެނޫންވެސް ބައެއް ބަސް ބަހުން ޚުތުބާ އޮންލައިން ކޮށް ކިޔާލެވޭނެ މަގުވެސް ފަހު ކުރުމަށް މިނިސްޓްރީން އަންނަނީ މަސައްކަތް ކުރަމުން ކަން ޝަހީމް ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
