ރައްޔިތުންގެ މަޖިލީހުގެ ރައީސް، މުޙައްމަދު އަސްލަމް އިންޑިއާ އިން ރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރާއި ބައްދަލު ނުކުރައްވާ ކަމަށް އިންޑިއާ ހައިކޮމިޝަނުން ވެސް ބުނެފިއެވެ.
އަސްލަމާއި، މެމްބަރު އަލީ ނިޔާޒް އަދި މެމްބަރު ހުސެއިން (އަނދުން ހުސެއިން) ހުޅުމާލޭގައި ހުންނަ އަމީން އެވެނިއު އޯކް އިން ސަފީރު މުނޫ މަހާވަރާއި ބައްދަލު ކުރެއްވި ކަމަށް ބުނާ ޓްވީޓެއް އެއީ ފޭކް ކަމަށް ބުނެ އެ ކޮމިޝަނުން ވަނީ އެކްސް ގައި ފޮޓޯ އެއް ހިއްސާ ކޮށްފައެވެ.
އެ ފޮޓޯގައިވާ ޓްވީޓްގައި ވަނީ އިއްޔެ ހަވީރު 17:30 އިން 19:45 އާއި ހިސާބަށް ކުރިއަށް ދިޔަ މި ބައްދަލުވުން ނިންމާލުމަށް ފަހު މެމްބަރު އަލީ ނިޔާޒާއި މެމްބަރު ހުސެއިން އަލުން އެ އިމާރާތަށް ވަދެފައިވާކަމަށެވެ.
މި ކަމާ ގުޅިގެން ރޭ ދަރުބާރުގޭގައި ކުރިއަށް ދިޔަ ޕީޕީއެމް/ޕީއެންސީ ގެ ހާއްސަ ހަފްލާގައި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ އެ ޕޯސްޓަށް އިޝާރަާތް ކުރައްވާ އެކަމާއި ގުޅިގެން ކަންބޮޑުވުން ފާޅު ކުރައްވާފައެވެ.
ނަމަވެސް ރައްޔިތުންގެ މަޖިލީހުގެ ތަރުޖަމާނު ހަސަން ޒިޔާއު މީޑީއާ ތަކަށް ފޮނުވި މެސެޖެއްގައި ވެސް ބުނީ އަސްލަމް އިއްޔެ އެއްވެސް ގައުމެއްގެ ސަފީރަކާއެކު އެއްވެސް ބައްދަލުވުމެއް ބާއްވަވާފައެއް ނުވާކަމަށާއި ރަސްމީ ބައްދަލުވުމެއްވެސް އަދި ނުރަސްމީ ބައްދަލުވުމެއްވެސް, އެއްވެސް ސަފީރަކާއެކު ބާއްވަވާފައި ނުވާ ކަމަށެވެ.
Advertisement
This content is created and paid for by advertisers and does not involve Voice Journalists
