ޖަޕާނަށް އައި ބިންހެލުން ތަކުގެ ނުރައްކަލެއް ރާއްޖެއަށް ނެތްކަމަށް މޫސުމާއި ބެހޭ އިދާރާއިން ބުނެފިއެވެ.

ސިލްސިލާ ބާރުގަދަ ބިންހެލުންތަކެއް އައިސް ޖަޕާނުގެ ހުޅަނގުގެ ސަރަހައްދުތަކަށް ސުނާމީގެ އިންޒާރު ވަނީ ދީފައެވެ.

ޖަޕާނުގެ މީޓަރޮލޮޖިކަލް އެޖެންސީން ރިޕޯޓްކޮށްފައިވާ ގޮތުގައި ހޯމަ ދުވަހު އިޝިކާވާ އާއި ކައިރީގައިވާ ޕްރިފެކްޗަރތަކަށް ބިންހެލުމެއް އައިސްފައިވާއިރު އޭގެ ތެރެއިން އެއް ޕްރިފެކްޗަރަށް އައި ބިންހެލުން މެގްނިޓިއުޑް 7.6 އަށް އަރާފައިވެއެވެ.

Advertisement

އެހެންކަމުން އިޝިކާވާއަށް ސުނާމީގެ ބޮޑު އިންޒާރެއް ނެރެ، ހޮންޝޫގެ ހުޅަނގު އުތުރުގެ އެހެން ހިސާބުތަކަށް ވެސް ވަނީ ސުނާމީގެ އިންޒާރު ދީފައިއެވެ.

މި ސަރަހައްދު ތަކުގައި ދިރިއުޅޭ ހުރިހާ ރައްޔިތުން ވަގުތުން އުސް ބިމަކަށް ބަދަލުވާން ޖެހޭނެ ޕަބްލިކް ބްރޯޑްކާސްޓާ (އެންއެޗްކޭ) އިން ވަނީ ބުނެފައެވެ.

އިޝިކާވާގެ ވާޖިމާ ސިޓީގެ އައްސޭރިފަށުގައި އެއް މީޓަރަށް ވުރެ އުސްމިނުގައި (3.3 ފޫޓު) ރާޅުތަކެއް އަރާފައިވާ ކަމަށް އެންއެޗްކޭ އިން ބުނެ އެވެ. އަދިވެސް އިޝިކާވާއަށް އިތުރު ބިންހެލުން ތަކެއް އަތުވެދާނެ ކަމުގެ އިންޒާރު ވަނީ ދީފައެވެ.

މި ބިންހެލުން ތަކުގެ ސަބަބުން ފަސް މީޓަރު (16.5 ފޫޓު) އުސްމިނުގެ ސުނާމީ ނޮޓޯއާ ހަމައަށް ފޯރާނެ ކަމަށް ބެލެވޭ ކަމަށް ޖަޕާނުގެ މޫސުމާ ބެހޭ އިދާރާއިން ބުނެ އެވެ.

ޖަޕާނުގެ ކަންސައި އިލެކްޓްރިކް އިން ބުނީ ބިންހެލުން އައި ސަރަހައްދުގައި ހުރި ނިއުކްލިއާ ޕްލާންޓްތަކުން އެއްވެސް އާދަޔާ ހިލާފު ކަމެއް ފެނިފައި ނުވާ ކަމަށް ޖަޕާނުގެ ކަންސައި އިލެކްޓްރިކް އިންވެސް ވަނީ ބުނެފައެވެ.

ދެކުނު ކޮރެއާގެ މޫސުމާބެހޭ އިދާރާއިން ބުނީ ޖަޕާނަށް އައި ބިންހެލުންތަކުގެ ސަބަބުން އެ ގައުމުގެ އިރުމަތީ އައްސޭރީގައި އޮންނަ ގަންގްވޮން ޕްރޮވިންސްގެ ބައެއް ސަރަހައްދުތަކުގެ ކަނޑުގެ ލޮނުގަނޑު އުފުލިފައިވާ ކަމަށެވެ.

ޖަޕާނަކީ ދުނިޔޭގެ ބިންހެލުންތަކުގެ ނުރައްކާ އެންމެ ބޮޑު އެއް ގައުމުކަން ފާހަގަ ކޮށްލެވެއެވެ.