އިސްރާއީލުން ދެމުންގެންދާ ހަމަލާތަކުގައި ޝަހީދުވި ފަލަސްތީން ރައްޔިތުންގެ އަދަދު 22,000 ގާތަށް އަރައިފިއެވެ.

އަލް ޖަޒީރާއިން ރިޕޯޓް ކުރާގޮތުގައި މިދިޔަ އަހަރުގެ އޮކްޓޫބަރު މަހު 7 ކުން ފެށިގެން އިސްރާއީލު ސިފައިން ދެމުންގެންދާ ހަމަލާ ތަކުގެ ސަބަބުން އިއްޔެ އާއި ހިސާބަށް 21،822 މީހަކު ޝަހީދުވެ، 56،451 މީހަކު ވަނީ ޒަޚަމް ވެފައެވެ.

އަނިޔާވެރި އިސްރާއީލުން ފާއިތުވެ ދިޔަ 24 ގަޑި އިރު ތެރޭ ޣައްޒާއަށް ދިން ހަމަލާތަކުގައި ގާތްގަނޑަކަށް 100 މީހުން ޝަހީދުވެ 286 މީހަކު ޒަހަމް ވެފައިވާ ކަމަށް ފަލަސްތީނުގެ ސިއްހަތާއި ބެހޭ ވުޒާރާއިން މައުލޫމާތު ދެއެވެ. އަދި މިއަދު އިސްރާއީލުން ދިން ވައިގެ ހަމަލާތަކެއްގައި 24 މީހަކު ވަނީ ޝަހީދުވެފައެވެ.

Advertisement

ހައްދުފަހަނަ އަޅާފައިވާ އިސްރާއިލުގެ ސިފައިން މެދު ނުކެނޑި ދެމުންގެންދާ ހަމަލާ ތަކުގެ ސަބަބުން ޣައްޒާގެ ގެދޮރު ގެ 70% ވަނީ ހަލާކުވެފައެވެ.

މި ހަމަލާތަކުގެ ސަބަބުން ފަލަސްތީނުގެ އެތައް ހާސް އަންހެނުންނާއި ކުޑަކުދިން ޝަހީދުވެފައި ވާއިރު، ވަގުތުން މި ހަމަލާތައް ހުއްޓާލައި، ފަލަސްތީނުގެ ރައްޔިތުންނަށް ބޭނުންވާ އިންސާނީ އެހީ ފޯރުކޮށްދިނުމަށް ދުނިޔޭގެ އެކި ކަންކޮޅުތަކުން އަންނަނީ ގޮވާލަމުންނެވެ.