ފަލަސްތީނުގެ ޣައްޒާގައި ހުންނަ ރެޑް ކްރެސެންޓް އިމާރާތަށް އަނިޔާވެރި އިސްރާއީލުން ދިން ވައިގެ ހަމަލާއެއްގައި އެ އިމާރާތް ސުންނާފަތިކޮށްލައިފިއެވެ.

ޣައްޒާގެ ދެކުނުގައި އޮންނަ ޚާން ޔޫނިސް ސިޓީގައި ހުންނަ ފަލަސްތީން ރެޑް ކްރެސެންޓް ސޮސައިޓީގެ މައި މަރުކަޒުގެ އަށް ވަނަ ފަންގިފިލައަށް އިސްރާއީލުގެ ޖެޓްތައް މިހަފްތާގެ އަންގާރަ ދުވަހު ހަމަލާދީ އެތައް ބަޔަކު ވަނީ ޝަހީދުކޮށްލާ، ގިނަ ބަޔަކު ވަނީ ޒަޚަމް ވެފައެވެ. ރެޑް ކްރެސެންޓުގެ ޢިމާރާތުގައި އެ ޖަމުޢިއްޔާގެ މައި މަރުކަޒާއި އަލްޢަމާލް ހަސްފަތާލާއި ހޮޓަލަކާއި ޚާއްޞަ އެހީއަށް ބޭނުންވާ މީހުންނަށް ޚާއްޞަކޮށްފައިވާ ޢިމާރާތެއް ވެސް ހިމެނެއެވެ.

އިސްރާއީލުން ކެނޑިނޭޅި ދެމުންގެންދާ ހަމަލާތަކުގެ ސަބަބުން ފަލަސްތީނުގެ ގެދޮރު ގެއްލިފައިވާ ފަލަސްޠީނުގެ 14،000 މީހުން ވެސް އެ ޢިމާރާތުގައި ދިރިއުޅެއެވެ.

މިދިޔަ ހަފްތާގައި ވެސް ހައްދުފަހަނަ އަޅާފައިވާ އިސްރާއީލުގެ ޖެޓްތައް ހަމަ އެ ފަންގިފިލާއަށް އަމާޒުކޮށް ދިން ހަމަލާތަކެއްގައި ފަލަސްތީނުގެ ގެދޮރު ގެއްލިފައިވާ އެތައް ބަޔަކު ވަނީ ޒަޚަމްވެފައެވެ.

މިދިޔަ އަހަރުގެ އޮކްޓުބަރު މަހުގެ 7 ވަނަ ދުވަހު އިސްރާއީލުން ފަލަސްތީނަށް ދޭންފެށި ހަމަލާތަކުގައި މިހާތަނަށް 22،185 މީހުން ޝަހީދުވެ 57،035 މީހުން ވަނީ ޒަހަމްވެފައިއެވެ.

ހަމައެހެންމެ އިސްރާއީލުގެ ލާއިންސާނީ ހަމަލާތަކުގެ ސަބަބުން ޣައްޒާ ގެ ގެދޮރުވެރިކަމުގެ 60 ޕަސެންޓް ހަލާކުވެ، ކާބޯތަކެއްޗާއި ސާފު ފެނާއި ބޭހުގެ ދަތިކަމާއި ޣައްޒާގެ ރައްޔިތުނަށް ކުރިމަތިލާންޖެހި، ގާތްގަނޑަކަށް 2 މިލިއަން ރައްޔިތުންގެ ގެދޮރު ވަނީ ގެއްލިފައެވެ.

 މި ހަމަލާތައް ވަގުތުން ވަގުތަށް ހުއްޓާލައި، ފަލަސްތީނުގެ ރައްޔިތުންނަށް ބޭނުންވާ އިންސާނީ އެހީ ފޯރުކޮށްދިނުމަށް ދުނިޔޭގެ އެކި ކަންކޮޅުތަކުން އަންނަނީ ގޮވާލަމުންނެވެ.