އިސްލާމްދީނުގެ ސައްޙަ އަގީދާގެ މައްޗަށް މުޅި ގައުމު ބިނާ ކުރުމަށް ސަރުކާރުން ކުރިއަށް ގެންދާ ރިސާލަތު ޕްރޮގްރާމް މިއަދު އިފްތިތާހް ކޮށްފިއެވެ. 

މިޕްރޮގްރާމްގެ މަގުސަދަކީ، ދިވެހި ރައްޔިތުންގެ ހިތްތަކުގައި އިސްލާމްކަމާއި، އީމާންކަމުގެ ރުކުންތައް ހަރުދަނާކޮށް، އަގީދާ ވަރުގަދަ ކުރުމާއިއެކު، އިސްލާމްދީނުގެ މައިގަނޑު ރުކުންތަކަށް އަހުލުވެރިވެފައިވާ ޖީލެއް ބިނާ ކުރުން ކަމަށް އިސްލާމިކް މިނިސްޓްރީން މައުލޫމާތު ދެއެވެ. 

އެގޮތުން ޕްރޮގްރާމްގެ ތެރެއިން، ޚުތުބާ، ދަރުސް، މީޑިއާ ޕްރޮގްރާމްތައް، ފޯރަމް، ސެމިނަރ، އުމްރް ޓުއާރ، ސްކޫލް އެގްޒިބިޝަން/ފެއަ، މުބާރާތް ބޭއްވައިގެން، އަދި މީސްމީޑިއާ މެދުވެރިކޮށް، އިސްލާމްދީނަކީ ހައްގު ދީން ކަމާއި، ދިވެހިންގެ ހިތްތަކުގައި ނުގުޑާ ފަދަ އިސްލާމީ އަޤީދާއެއްގެ ބިންގާ އެޅުން ފަދަ ކަންކަން ހިމެނެއެވެ. 

މި ޕްރޮގްރާމް އިފްތިތާޙްކުރުމުގެ ރަސްމިއްޔާތުގައި ވާހަކަދައްކަވަމުން، ޝަހީމް ވިދާޅުވީ، ރިސާލަތު ޕްރޮގްރާމަކީ އިސްލާމްދީނުގެ ސައްހަ އަގީދާގެ މައްޗަށް މުޅި ގައުމު ބިނާ ކުރުމަށް ކުރިއަށް ގެންދެވޭ ޕްރޮގްރާމެއް ކަމަށެވެ. އެގޮތުން ހުރިހާ އުމުރުފުރާ އަކަށް އަމާޒުކޮށް ހަރަކާތްތައް ހިންގައި، އެއްވެސް މަޖުބޫރު ކަމެއްނެތި، ދީން ދެކެ ލޯބިވުމުގެ ސިފަ، ދިވެހިންގެ ކިބާގައި އަށަގެންނެވުން ހިމެނޭކަމަށް އެބޭފުޅާ ވިދާޅުވި އެވެ. 

މީގެ އިތުރުން، ރިސާލަތު ޕްރޮގްރާމް ތެރެއިން މީޑިއާ ތަކަށް ވެސް ދީނީ މައުލޫއަށް ޕްރޮގްރާމްތައް ކުރިއަށް ގެންދިޔުމުގެ ފުރުސަތު ހުޅުވާލެވިގެންދާނެ ކަމަށާ، އެކަމަށްޓަކައި ސްޕޮންސަރ ކުރުމުގެ މަސައްކަތްވެސް މިނިސްޓްރީން ކުރާނެ ކަމަށް ޝަހީމް ވިދާޅުވި އެވެ. 

ހަމައެހެންމެ، ރިސާލަތު ޕްރޮގްރާމްގެ ތަފްސީލީ ޕްލޭން މިހާރުވެސް ހެދި، އިސްލާމިކް މިނިސްޓްރީގައި ވާ ކަމަށާ، މީޑިއާ ތަކުން ނުވަތަ ޖަމިއްޔާ އަކުން ނަމަވެސް، އެ ޕްރޮގްރާމްގެ ދަށުން ހިންގާ ހަރަކާތް ތަކުގައި ބޭނުންކުރާނެ، މައުލޫމާތު ތަކާއި ގުޅޭ ލިޔެކިޔުންތައްވެސް ޝާއިޢު ކޮށް ނިމިފައިވާ ކަމަށް ވިދާޅުވި އެވެ.