ކުރިއަށް އޮތް ރައްޔިތުން މަޖިލިސް އިންތިހާބުގައި ޕްރައިމަރީއަކާ ނުލައި އެމްޑީޕީގެ ޓިކެޓުގައި ވާދަކުރުމުގެ ފުރުޞަތު 36 ފަރާތަކަށް ކަށަވަރުވެފައިވާ ކަމަށް އެޕާރޓީން ބުނެފިއެވެ.

އެމްޑީޕީން ބުނިގޮތުގައި މި 36 ފަރާތަކީ އެމްޑީޕީގެ ޓީކެޓަށް ޝަޢުޤުވެރިވާ ފަރާތްތައް ހޯދުމަށް ހުޅުވާލި ފުރުޞަތުގައި ހަމަ އެންމެ ކެންޑީޑޭޓެއް ކުރިމަތިލައިފައިވާ ދާޢިރާތަކެވެ.

އެމްޑީޕީގެ ފަރަތުން މިއަދު މި ޢާއްމުކުރި 36 ފަރާތުގެ ތެރޭގައި މިހާރު މިހިނގާ 19 ވަނަ ރައްޔިތުން މަޖިލސްގައި ، މެމްބަރުކަން އަދާކުރައްވަމުން ގެންދަވާ ގިނަ ފަރާތްތަކެއް ހިމެނެއެވެ. މީގެ ތެރޭގައި މިހާރުގެ މަޖިލސްގެ ރައީސް ހިތަދޫ ދާޢިރާގެ މެމްބަރ މުޙައްމަދު އަސްލަމާއި، މަޖިލިހުގެ ނައިބު ރައީސަކަށް އެންމެ ފަހުން އިންތިޙާބު ކުރެވުނު ހޯރަފުށި ދާއިރާގެ މެމްބަރު އަހުމަދު ސަލީމް ފާހަގަ ކޮށްލެވެއެވެ.

ޕްރައިމަރީއަކާއި ނުލައި ޓިކެޓް ލިބޭ 36 ފަރާތުގެ ނަންތައް މިއަދު އެމްޑީޕީއިން އިއުލާނުކޮށްފައި ވާއިރު އެމްޑީޕީން ބުނީ އެއް ކެންޑިޑޭޓަކަށްވުރެ ގިނަ ކެންޑިޑޭޓުން ކުރިމަތިލާފައިވާ ދާއިރާތައް ޤައުމީ މަޖިލީހުން ނިންމުމާއި އެއްގޮތަށް އެކަމަށް އެކުލަވާލައިފައިވާ ވިލަރެސް ކޮމެޓީން ނިންމަވާގޮތެއް ފަހުގެ ތާރީހެއްގައި އިއުލާން ކުރާނެ ކަމަށެވެ.

އެމްޑީޕީގެ ފަރާތުން މަޖިލިސް މެމްބަރުކަމަށް ޝަޢުޤުވެރިކަން ފާޅުކޮށްފައިވާ ފަރާތްތަކުގެ މެދުގައި ބޭއްވުމަށް ހަމަޖެހިފައިވާ ޕްރައިމަރީ އޮންނާނީ މި މަހުގެ 26 ވަނަ ދުވަހާއި އަދި 27 ވަނަ ދުވަހު ކަމަށް އެޕާރޓީން ބުނެއެވެ.