މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ގެ ސިޓީއަކާ އެކު އިލެކްޝަން ކޮމިޝަން (އީސީ) އިން 20 ވަނަ ރައްޔިތުންގެ މަޖިލީހުގެ އިންތިހާބު ބާއްވާ ތާރީހު އިއުލާނު ކުރުން ފަސްކޮށްފިއެވެ.

ރައްޔިތުންގެ މަޖިލީހުގެ އިންތިހާބު ބާއްވާނެ ތާރީހު މިއަދު އިއުލާނު ކުރަން ހަމަޖެހިފައިވާ ކަމަށް އީސީ ގެ ނައިބު ރައީސް އިސްމާއީލް ހަބީބް ކުރިން ވަނީ ވިދާޅުވެފައި އެވެ. 

އެހެންނަމަވެސް މިއަދު އެ ކަމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހަބީބް ވިދާޅުވީ މިއަދު އިންތިހާބުގެ ތާރީހު އިއުލާނު ކުރަން ނިންމާފައި އޮތް ނަމަވެސް، މިދިޔަ ބުރާސްފަތި ދުވަހު އެމްޑީޕީގެ ފަރާތުން އެ ކޮމިޝަނަށް ސިޓީއެއް ލިބިފައިވާތީ އިންތިހާބު ބާއްވާނެ ތާރީހު އިއުލާނު ކުރާނީ އެ ޕާޓީއާ މަޝްވަރާ ކުރެއްވުމަށްފަހުގައި ކަމަށެވެ.

އީސީން ވަނީ ގާނޫނު ބުނާ މުއްދަތުގައި އިންތިހާބު ބާއްވަން ބަލާއިރު ރޯދަ މަހާ ދިމާވާތީ އިންތިހާބު ބާއްވާ ތާރީހަށް ބަދަލު ގެނައުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމެޓީގައިވެސް އެދިފަ އެވެ.

ދިވެހި ރާއްޖޭގެ ގާނޫނު އަސާސީގައި ބުނާ ގޮތުން މަޖިލީހުގެ ހިނގަމުންދާ ދައުރު ނިމެން 120 ދުވަހަށް ވުމާއެކު، 10 ދުވަހުގެ ތެރޭގައި އިންތިހާބަށް ހުޅުވާލަން ޖެހެ އެވެ. އިންތިހާބަށް ކުރިމަތިލާން 14 ދުވަހުގެ މުއްދަތެއް ދިނުމަށްފަހު އިންތިހާބަށް ކުރިމަތިލާ މީހުން އިއުލާނުކުރާ ތާރީހުން ފެށިގެން 30 ދުވަހުގެ ތެރޭގައި އިންތިހާބު ބާއްވަން ޖެހެ އެވެ.

އެހެންނަމަވެސް މި ގޮތަށް އިންތިހާބު ބާއްވާނަމަ، އިންތިހާބު ބޭއްވޭން އޮތީ ރޯދަ މަސް ތެރޭގަ އެވެ. އެއީ، މި އަހަރުގެ މާޗް މަހުގެ 30 ވަނަ ދުވަހެވެ. އެހެންކަމުން ރޯދަ މަހު މި އިންތިހާބު ބާއްވާނަމަ ކެންޑިޑޭޓުންގެ ކެމްޕޭނުގެ ކަންކަމާއި އަދި އެ ކޮމިޝަންގެ މުވައްޒަފުން މަސައްކަތް ކުރުމަށް ވެސް ބޮޑެތި ދަތިތަކާއި އުނދަގޫތައް ކުރިމަތިވާނެ ކަން އީސީއިން ވަނީ ފާހަގަކޮށްފައެވެ.

އެހެންކަމުން މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީން ނިންމީ ރޯދައިގެ ފަހުން އިންތިހާބު ބޭއްވުމަށެވެ.

އިންތިހާބުގެ ތާރީހު ކަނޑައެޅުމަށް އީސީން ވަނީ ސިޔާސީ ޕާޓީތަކާ އެކު ވެސް މަޝްވަރާ ކޮށްފައި ކަން ފާހަގަކޮށްލެވެއެވެ.