އިންޑިއާގެ ގިނަ ފަތުރުވެރިންނާއެކު މި އަހަރުގެ ފުރަތަމަ ކްރޫޒްލައިނާ ރާއްޖެ އަތުވެއްޖެއެވެ.

އިންޑިޔާގެ ކޮޗިން އިން ރާއްޖެއަށް ދަތުރުކުރި "ކޯސްޓާ ސެރީނާ" ނަމަކަށް ކިޔާ މި ކްރޫޒްލައިނާ މާލެއަށް ބަނދަރު ކޮށްފައިވަނީ އިއްޔެގެ ހެނދުނު 6:00 ޖެހިއިރުއެވެ.

މިއީ އިޓަލީވިލާތުގެ ކްރޫޒްލައިނާއެކެވެ. މިއިން 1،985 ފަތުރުވެރިން އައިސްފައިވާއިރު، އޭގެ ތެރެއިން 90 ޕަސެންޓް ފަތުރުވެރިން ނިސްބަތްވަނީ އިންޑިއާއަށް ކަމަށް ރާއްޖެއަށް ކްރޫޒްލައިނާތައް ގެންނަ ކުންފުނިތައް ތަމުސީލުކުރާ މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ)ގެ ރައީސް މުހައްމަދު ނަޝީދު ވަނީ ވިދާޅުވެފައެވެ.

މި ކްރޫޒްލައިނާ ރާއްޖެއައިސްފައި ވަނީ އިންޑިއާގެ މުމްބާއީ އަދި ގޯއާ ފަދަ ސަރަހައްދުތަކުގައި ބަނދަރު ކުރުމަށްފަހުގަ އެވެ.

މާޔާ އިން ބުނީ މިއަހަރުގެ މޭ މަހާއި ހަމައަށް 14 ކްރޫޒްލައިނާއެއް ރާއްޖެއަށް ދަތުރު ކުރުމަށް ހަމަޖެހިފައިވާކަމަށެވެ. ހަމައެކަނި މިމަހުގެ ތެރޭގައިވެސް ބ. އަތޮޅަށާއި މާލެ ސިޓީއަށް 2 ކްރޫޒްލައިނާއެއް ދަތުރު ކުރުމަށް ހަމަޖެހިފައިވާކަމަށްވެސް މާޔާއިން މަޢުލޫމާތުދެއެވެ.

އިންޑިއާގެ ގިނަ އަދަދެއްގެ ފަތުރުވެރިން ރާއްޖެއަށް އައިސްފައި މިވަނީ ރާއްޖޭގެ ތިން ޑެޕިއުޓީ މިނިސްޓަރަކު ސޯޝަލް މީޑިއާ ތެރޭގައި އިންޑިއާގެ ބޮޑު ވަޒީރު ނަރެންދްރަ މޯދީއަށް ކުޑައިމީސް ކުރި މައްސަލައިގައި ދެ ގައުމުގެ ދެމެދުގައި ހޫނު ބަހުގެ ހަމަލާތަކެއް ބަދަލުކުރެވި، އިންޑިއާއިން ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލަމުންދާ ދަނޑިވަޅެއްގައެވެ.

ސަރުކާރުން ވަނީ މި ތިން ޑެޕިއުޓި މިނިސްޓަރުން ސަސްޕެންޑް ކޮށް މި އަމަލު ކުށްވެރިކޮށްފައެވެ.