ދިވެހިރާއްޖޭގައި އިންވެސްޓުކުރުމަށް ޗައިނާގެ އިންވެސްޓަރުންނަށް ހުރި ތަފާތު ބޮޑެތި ފުރުސަތުތައް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފާހަގަކުރައްވައި، ރާއްޖޭގައި ހިންގާ ސްޓްރެޓެޖިކް މުހިއްމު މަޝްރޫޢުތަކަށް އިންވެސްޓުކުރުމުގެ ފުރުސަތު އެ ވިޔަފާރިތަކަށް ހުޅުވިފައި އޮތްކަން ހާމަކުރައްވައިފިއެވެ.

މި ފުރުސަތުތައް ރައީސް ހާމަކުރައްވައި އިއުލާން ކުރެއްވީ މިހާރު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި  މިއަދު ޗައިނާގެ ފޫޖިއާން ޕްރޮވިންސްގެ ވެރިރަށް ފޫޝޯގައި ފެށިގެން ކުރިއަށްދާ "އިންވެސްޓު މޯލްޑިވްސް" ފޯރަމުގައި ބައިވެރިވެ ވަޑައިގަންނަވާ ދެއްކެވި ވާހަކަފުޅުގައެވެ.

ރައީސް ގެ ވާހަކަފުޅުގައި ވަނީ، ޗައިނާގެ ރައީސް ޝީ ޖިންޕިން ފާހަގަކުރެއްވި ފަދައިން އެޤައުމުން ފަށާފައިވާ ބެލްޑް އެންޑް ރޯޑް އިނިޝިއޭޓިވް (ބީއާރުއައި)ގެ ސަބަބުން އެއްގަމާއި ކަނޑާއި ވައާއި ޑިޖިޓަލްކޮށް މުވާސަލާތުކުރުމުގެ އައު ރާސްތާތައް ހުޅުވި އެ އިނިޝިއޭޓިވްގައި ބައިވެރިވާ ޤައުމުތަކުގެ މެދުގައި މުދަލާއި، ރައުސުމާލާއި، ފަންނިއްޔާތާއި މީހުން ދަތުރުކުރާ ގޮތަށް އިންޤިލާބީ ބަދަލުތަކެއް އައިސްފައިވާ ކަން ފާހަގަ ކުރައްވައިފައެވެ. 

މީގެ އިތުރުން ދާދި ފަހުން އިފްތިތާހްކުރި، އެއާޕޯޓުގެ އައު ތަސައްވުރާއި، ރާއްޖޭގެ ވިޔަފާރީގެ ބަނދަރަކީ އެމަނިކުފާނުގެ ސަރުކާރުގެ މުހިއްމު އިސްތިރާޖީ މަސައްކަތްތަކެއް ކަމަށާއި އަދި އެއީ ބީއާރުއައިގެ އެއްގަމާއި ކަނޑާއި ވައާއި ޑިޖިޓަލް ގުޅުވައިލުމުގެ ތަސައްވުރެއް ފެތޭ މަސައްކަތްތަކެއްކަން ރައީސް ވަނީ ފާހަގަ ކުރައްވައިފައެވެ. 

ވުމާއެކު ބީއަރުއައިގެ އޮނިގަނޑުގެ ތެރެއިން މި މަޝްރޫޢުތައް ހިންގުމަށް މަސައްކަތްކުރާނެ ފަރާތްތައް ހޯދުމަށް ސަރުކާރު އޮތީ ތައްޔާރަށް ކަމުގައިވެސް ރައީސްގެ ވާހަކަފުޅުގައި ވިދާޅުވިއެވެ.

އޭގެ އިތުރުން ސަރުކާރުގެ ވިސްނުން ފަތުރުވެރިކަމުގެ ސިނާއަތް ހަރުދަނާކުރުމާއެކު އެހެނިހެން ސިނާއަތްތައް ތައާރަފުކޮށް އިޤުތިޞާދު ސިންދަފާތުކުރުމަށް ހުރިކަން ފާހަގަކުރައްވައި ރައީސް ވިދާޅުވީ އެކަންކުރައްވާނީ ތިމާވެއްޓާއި ކަނޑުގެ ވަސީލަތްތަކަށް ރިއާޔަތްކޮށްގެން ކަމަށެވެ. 

ރާއްޖޭގެ އިޤުތިޞާދު ބަދަލުކޮށްލެއްވުމުގެ އަމާޒުގައި ފުށި ދިއްގަރު ފަޅު ހިއްކައިގެން ތަރައްގީ ކުރާ ރަސްމާލެ މަޝްރޫއަކީ ރާއްޖޭގެ ފުރަތަމަ އީކޯ ފްރެންޑްލީ ޝަހަރުގެ ގޮތުގައި ތަރައްގީ ކުރާ މަޝްރޫއުކަން ފާހަގަކުރައްވައި އެ ސިޓީއަކީ 325،000 މީހުންގެ އާބާދީއަކަށް ދިރިއުޅުމަށް ބޭނުންވާ އުމްރާނީ އަދި ވިޔަފާރީގެ ވަސީލަތްތައް ޤާއިމުކުރެވިފައި ހުންނާނެ ސިޓީއެއްކަން ރައީސް ފާހަގަކުރެއްވިއެވެ.

ރައީސް އިތުރަށް ވިދާޅުވީ ރާއްޖޭގެ ހަކަތައިގެ ބޭނުންތަކާ އެކަށޭނެ މިންވަރަކަށް އިއާދަކުރަނިވި ހަކަތަ އުފެއްދުން އިތުރުކުރުމަކީ އެމަނިކުފާނުގެ މުހިއްމު ވައުދެއް ކަމަށާއި އެގޮތުން 2028 ވަނަ އަހަރުގެ ނިޔަލަށް ދިވެހިރާއްޖެއަށް ބޭނުންވާ ހަކަތައިގެ 33 އިންސައްތަ އިއާދަކުރުވަނިވި ހަކަތައިން އުފެއްދުމަށް ސަރުކާރުން އަމާޒު ހިފާފައިވާކަން ރައީސް ހާމަކުރެއްވިއެވެ.

އޭގެ އިތުރަށް ކާބޯތަކެތީގެ ރައްކާތެރިކަން ކަށަވަރުކުރުމަށް ފުޅާ ބޮޑު މަޝްރޫޢެއް ހިންގަވަން ރާއްވަވާފައިވާކަން ރައީސް ފާހަގަކުރެއްވިއެވެ. އެގޮތުން ރާއްޖޭގައި މަސް ޕްރޮސެސްކުރުމުގެ ޤާބިލުކަން އިތުރުކުރުމުގެ ވިސްނުމެއް ގެންގުޅުއްވާކަންވެސް ފާހަގަކުރެއްވިއެވެ.

އަދި ރާއްޖޭގެ އިޤުތިޞާދީ ވިލުންތެރިކަން ކަށަވަރުކުރުމަށް އިޤުތިޞާދު ސިންދަފާތުކުރުމުގެ ގޮތުން މޯލްޑިވްސް އިންޑަސްޓްރިއަލް ޑިވެލޮޕްމެންޓު ފްރީ ޒޯންގެ ނަމުގައި ކުންފުންޏެއް އުފައްދަވާފައިވާކަން ރައީސް ފާހަގަކުރެއްވިއެވެ. އިސްތިރާޖީ މުހިއްމު މަސައްކަތްތައް ހިންގައި ތަރައްޤީކުރާ ކުންފުންޏެއްގެ ދައުރު އެ ކުންފުނިން އަދާކޮށް، ދެމެހެއްޓެނެވި ދިރިއުޅުމެއް ރައްޔިތުންނަށް ކަށަވަރުކޮށްދިނުމަށް އެ ކުންފުނިން އިންވެސްޓުކުރާނެކަމަށް އެމަނިކުފާނު ވިދާޅުވިއެވެ.

އޭގެ އިތުރަށް ރައީސް ވިދާޅުވީ މިހުރިހާ ކަމެއް ހިންގާއިރު ރާއްޖޭގެ މައި ސިނާއަތްކަމަށްވާ ފަތުރުވެރިކަމުގެ ސިނާއަތް އިތުރަށް ތަރައްޤީކޮށް ސިންދަފާތުކުރުމާއި އައު ތަޖުރިބާތައް ބާޒާރަށް ނެރުމަށް ސަރުކާރުން މަސައްކަތްކުރާނެ ކަމަށެވެ. އެ އަމާޒު ހާސިލުކުރުމަށް ފަށާ ބައެއް އައު ކަންކަން ރައީސް ފާހަގަކުރެއްވިއެވެ.

އެގޮތުން ހޮސްޕިޓޭލިޓީގެ ދާއިރާއިން ތައުލީމު ދޭނެ މަތީ ފަންތީގެ ސުކޫލެއް ޤާއިމުކުރުމާއި، ކުޅިވަރާއި ސިއްހީ އަދި ސަގާފީ ފަތުރުވެރިކަން ތައާރަފުކުރުމަށް މަސައްކަތްކުރަމުން އަންނަކަން ފާހަގަކުރެއްވުމާއެކު، ރައީސް އެދިވަޑައިގަތީ ރާއްޖެއަށް ކޮވިޑުގެ ކުރިން އެންމެ ގިނައިން ފަތުރުވެރިން ޒިޔާރަތްކުރި ޤައުމެއްގެ ގޮތުގައި ޗައިނާ އޮތް ފަދައިން އެ މަޤާމަށް އަނބުރާ ޗައިނާ އިއާދަކުރުމުގެ މަސައްކަތް އިތުރަށް ބާރަށް ކޮށްދިނުމަށެވެ.

މި މަސައްކަތްތައް ފާހަގަކުރެއްވުމާއެކު ރައީސް ވިދާޅުވީ އެމަނިކުފާނުގެ ސަރުކާރުން ގެންގުޅޭ އަމާޒަކީ 2028 ވަނަ އަހަރުގެ ނިޔަލަށް ރާއްޖޭގެ ޤައުމީ އުފެއްދުންތެރިކަން 12 ބިލިއން ޑޮލަރަށް އިތުރުކޮށް ދެގުނަކުރުން ކަމަށެވެ. އެ އަމާޒުތައް ހާސިލުކުރުމަށް އަމިއްލަ ވިޔަފާރިތަކުގެ ދައުރުގެ މުހިއްމުކަމަށް ޤަބޫލުކުރައްވާކަމަށް ވިދާޅުވުމާއެކު، ބޭރުގެ އިންވެސްޓަރުންނާއި ބޭރުގެ މަސްދަރުތަކުން ފައިސާ ހަމަޖެހުމަކީ މި މުހިއްމު މަސައްކަތްތައް ހިންގުމަށް ކޮންމެހެންވެސް ބޭނުންތެރި ކަންކަން ކަމުގައި ދެކެވަޑައިގަންނަވާކަމަށް ރައީސް ވިދާޅުވިއެވެ.

ރައީސް ވިދާޅުވީ ބައިވެރިންގެ ގޮތުގައި ދެކިގެން އެ ވިޔަފާރިތަކާއެކު މަސައްކަތްކުރާނެކަމުގެ ޔަގީންކަން ސަރުކާރުގެ ފަރާތުން ދެއްވާ ކަމަށެވެ. އަދި ރާއްޖެއަށް އިންވެސްޓުކުރުމުގައި ދަތިތަކެއް ނެތި، ރާއްޖޭގައި ވިޔަފާރިކުރުމަކީ ފަސޭހަ ތަޖުރިބާއަކަށްވާނެ ކަށަވަރުކަން ރައީސްވަނީ އެ ފޯރަމުގެ ބައިވެރިންނަށް ދެއްވާފައެވެ.