ރާއްޖޭގެ ގައުމީ އެއާލައިން، މޯލްޑިވިއަނުން ރާއްޖެ އިން ބޭރަށް ކުރާ ދަތުރުތައް އިތުރުކޮށް ފުޅާކުރުމުގެ ގޮތުން އަށް ބޮއިން 8-787 މަރުކާގެ ބޯޓެއް ކުއްޔަށް ނަގަން އިއުލާނުކޮށްފިއެވެ.

އެކުންފުނިން ބޮއިން 8-787 މަރުކާގެ ބޯޓެއް ޑްރައި ލީޒް އުސޫލުން ދޭނެ ފަރާތެއް ހޯދުމަށް ގެޒެޓްކުރި އިއުލާނުގައި ބުނެފައިވަނީ، ރިކުއެސްޓް ފޯ ޕްރޮޕޯސަލްގައި ކަނޑައަޅާފައިވާ ޝަރުތުތަކާއެކު ހަ އަހަރު ދުވަހުގެ މުއްދަތަށް މަތިންދާބޯޓު ޑްރައި ލީޒް އުސޫލުން ދޭން ޝަރުތު ހަމަވާ ފަރާތްތަކަކަށް އެ ފުރުސަތު ހުޅުވާލާ ކަމުގައެވެ. 

އެ ބިޑްގައި ރަޖިސްޓްރީވުމަށް މި މަހުގެ 25 އާ ހަމައަށް ވަނީ ފުރުސަތު ހުޅުވާލެވިފައެވެ. ކުއްޔަށް ދޫޚުރާ ބޯޓަކީ 270 ޖާގަ ލިބޭ އިކޮނޮމީ އަދި ބިޒްނަސް ކްލާސް ހިމެނޭ ބޯޓަކަށް ވާންޖެހޭނެ ކަމުގައިއެ ކުންފުނީގެ އިއުލާނުގައިވެއެވެ. 

Advertisement

އޭގެ ތެރެއިން ބިޒްނަސް ކްލާހުގެ އެންމެ މަދުވެގެން 15 އާއި 20 ޖާގަ ހުންނަންޖެހޭނެ ކަމުގައިވެސް އެ އިއުލާނުގައި ވެއެވެ.

މޯލްޑިވިއަނުން ވައިޑް-ބޮޑީ ބޯޓެއް ހޯދާ އިރު، ދާދި ފަހުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެފައި ވަނީ ވައިޑް-ބޮޑީ-ބޯޑުގެ ބޯޓާ އެކީ އާ 7 މަންޒިލަކަށް ދަތުރު ފަށާނެ ކަމަށެވެ.