ޗައިނާއިން ރާއްޖޭގެ އިންފްރާސްޓްރަކްޗާ އާއި އިގްތިސާދީ ކަންކަމަށް ފޯރުކޮށްދެމުން އަންނަ އެހީތެރިކަމާއެކު ރާއްޖޭގެ އިޤްތިޞާދަށް ބޮޑެތި ފައިދާތަކެއް ލިބިފައިވާ ކަމަށް ޚާރިޖީ ވަޒީރު މޫސާ ޒަމީރު މިއަދު ވިދާޅުވެއްޖެއެވެ.
ޗައިނާގެ ރައީސްގެ ދައުވަތަކަށް އެ ޤައުމަށް ރައީސް ޑރ މުހައްމަދު މުއިއްޒު ކުރައްވަމުން ގެންދަވާ ފުރަމާނަ ދަތުރުފުޅުގައި އެމަނިކުފާނުގެ އަރިހުގައި ހުންނަވައި ޚާރިޖީ ވަޒީރު މޫސާ ޒަމީރު ކުރެއްވި ޓުވީޓެއްގައި ވިދާޅުވެފައިވަނީ، ޗައިނާގެ ފުޖިއާން ޕްރޮވިންސްގައި ބޭއްވި އިންވެސްޓް މޯލްޑިވްސް ފޯރަމްގައި، އެންގޭޖްމަންޓާއި، ޕާޓްނަޝިޕް ބިލްޑިން އާއި، ފޯކަސްޑް ޑެލިވަރީގެ ތެރެއިން ރާއްޖޭގެ ތަރައްގީއަށް ރައީސުލްޖުމްހޫރިއްޔާގެ ތަސައްވުރު ހިއްސާކުރެއްވިފައިވާ ކަމަށެވެ.
އެގޮތުން ޗައިނާއަކީ އަބަދުވެސް ރާއްޖެއަށް އެހީތެރިކަން ފޯރުކޮށްދޭ ގައުމެއްކަން ފާހަގަކުރައްވަމުން ޒަމީރު ވިދާޅުވީ ޗައިނާގެ ސަބަބުން ރާއްޖޭގެ އިގްތިސާދަށް އަދި އިންފްރާސްޓްރަކްޗާއަށްވެސް ގިނަ ފައިދާ ލިބި ކުރިއެރުން ލިބިފައިވާ ކަމަށެވެ.
ބެލްޓް އެންޑް ރޯޑް އިނިޝިއޭޓިވްގެ ސަބަބުން އަޅުގަނޑުމެންގެ އިންފްރާސްޓްރަކްޗަރ އާއި އިގްތިސާދަށް ބޮޑެތި ފައިދާތަކެއް ލިބިއްޖެ
މޫސާ ޒަމީރު
މީގެ އިތުރުން ސަރުކާރާއި ވިޔަފާރި އާއި ސަގާފަތުގެ ދާއިރާއިން ރާއްޖެ އާއި ޗައިނާއާ ދެމެދު ކުރިއަށްދާ ވަރުގަދަ އަދި ނަތީޖާ ނެރެދޭ އެއްބާރުލުމަށް ވަޒީރު ވަނީ ޝުކުރު އަދާކުރައްވައިފައެވެ.
އަދި ވިޔަފާރި ކުރިއެރުވުމަށް ޗައިނާއިން ފޯރުކޮށްދޭ އެހީން ރާއްޖޭގެ މަސްވެރިކަމުގެ ސިނާއަތަށްވެސް ފައިދާ ކުރާނެ ކަމުގައިވެސް ވަޒީރު ވަނީ ވިދާޅުވެފައެވެ.
މިނިވަން ވިޔަފާރީގެ އެއްބަސްވުމުގެ ސަބަބުން އަޅުގަނޑުމެންގެ ވިޔަފާރިއާއި އިންވެސްޓްމަންޓަށް، ޚާއްސަކޮށް އަޅުގަނޑުމެންގެ މަސްވެރިކަމުގެ ދާއިރާއަށް އާ ފުރުސަތުތަކެއް ލިބިގެންދާނެ. އަޅުގަނޑުމެން އިންތިޒާރު ކުރަނީ ޗައިނާ އާއި ރާއްޖޭގެ ގުޅުން ބަދަހިކޮށް، އަޅުގަނޑުމެންގެ ރައްޔިތުންގެ ދެފަރާތުގެ ފައިދާއަށްޓަކައި އެއްބާރުލުން ދިނުމުގެ އާ މަގުތައް ހޯދުމަށް
މޫސާ ޒަމީރު
އަދި ހަމައެއާއެކު ދެގައުމުގެ ގުޅުން އިތުރަށް ބަދަހިކުރެވި އިތުރު ތަރައްޤީ ރާއްޖެއަށް ގެނައުމުގެ މަސައްކަތް ކުރަމުންދާ ކަމަށްވެސް ޒަމީރު ވަނީ ވިދާޅުވެފައެވެ.
ރައީސް ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިން އެންމެ މުހިއްމަ ކަމެއްގެ ގޮތުގައި ކުރިއަށް ގެންދެވީ ރާއްޖޭގައި އިންވެސްޓްކުރުމަށް ހުރި ފުރުސަތުތައް އަލި އަޅުވާލައި ކުރިއަށް ގެންދެވުނު "އިންވެސްޓު މޯލްޑިވްސް" ފޯރަމެވެ.
ޗައިނާއިން އެކަނިވެސް 300ށް ވުރެ ގިނަ އިންވެސްޓަރުން ބައިވެރިވި މި ފޯރަމްގައި ޗައިނާގެ އިންވެސްޓަރުންނަށް ރާއްޖޭގައި ހުރި ފުރުސަތުތައް ފާހަގަކޮށް އެކަން ހާމަކޮށްފައެވެ. އެގޮތުން އެކި ދާއިރާތަކުން ހިންގޭ ތަރައްގީގެ ބިޔަ ބޮޑެތި މަޝްރޫޢުތައް ކުރިއަށް ގެންދިއުމުގައި ޗައިނާގެ އިންވެސްޓަރުންނަށް ހުރި ފުރުސަތުތަކަށް އަލިއަޅުވާލައި އެކަމުގެ ތަފްސީލުތައް ހާމަކުރައްވައިފައެވެ.
Advertisement
This content is created and paid for by advertisers and does not involve Voice Journalists
