މިއަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިޚާބު ބާއްވާ ތާރީޚް އިލެކްޝަންސް ކޮމިޝަނުން އިއުލާން ކޮށްފިއެވެ. 

އިލެކްޝަންސް ކޮމިޝަނުން މިއަދު ކުރި އިއުލާނެއްގައި ބުނީ، ރައްޔިތުންގެ މަޖިލީހުގެ އިންތިޚާބު ބޭއްވުމަށް މިހާރު ހަމަޖެހިފައިވަނީ މާރިޗު މަހުގެ 17 ވާ އާދިއްތަ ދުވަހު ކަމަށެވެ. 

އެ ތާރީހުގައި އިންތިޚާބު ބާއްވަން ނިންމި ސަބަބު ހާމަކޮށް އެ ކޮމިޝަނުން ބުނީ، މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބު، 1445 ވަނަ އަހަރުގެ ރަމަޟާންމަހާ ދިމާވާތީ އާއި ރަމަޟާން މަހުގެ ފަހުގެ ތާރީހެއްގައި އިންތިލާ ބޭއްވުމަށް އިދާރީ ބޮޑެތި ހުރަސްތަކެއް ހުރުން ކަމަށެވެ. 

އަދި މީގެ އިތުރުން، ތައުލީމާ ވުޒާރާއިން އިސްލާހުކޮށް އާންމުކޮށްފައިވާ ދިރާސީ ކަލަންޑަރުގައިވާ ގޮތުން ޢީދު ބަންދަށްފަހު، ފެށޭ ހަފްތާއަކީ ސުކޫލުތަކުގެ އިމްތިހާނު ދުވަސްތަކަށްވާތީ އެދުވަސްވަރު ސްކޫލްތައް ލިބުންވެސް ދަތިވާނެތީ ވޯޓުލާ މަރުކަޒުތައް ގާއިމުކުރުމަށްޓަކައި އެކަށީގެންވާ ތަންތަން ނުލިބޭނެކަންވެސް އީސީން ފާހަގަކޮށްފައި ވެއެވެ.

ހަމައެހެންމެ، ރަމަޟާންމަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި މިހާރު ކަނޑައަޅާފައިވާތީ، ސަރުކާރުގެ ވުޒާރާ ތަކާއި ދައުލަތުގެ މުއައްސަސާތަކުގެ އެހީތެރިކަމާއި އެއްބާރުލުމާއެކު ކުރަންޖެހޭ މަސައްކަތްތައް ކުރުމުގެ ދަތިތައް ވެސް ދިމާވާނެތީ، ރައްޔިތުންގެ މަޖިލީހުގެ އިންތިހާބު، ރޯދަ މަހުގެ ފުރަތަމަ 10 ގެ ތެރޭގައި، މާރިޗު 17 ވާ އާދިއްތަ ދުވަހު ބޭއްވުމަށް ނިންމާފައިވާ ކަމަށް އެ ބަޔާނުގައި ވެއެވެ.