މި އަހަރު ބޭއްވުމަށް ހަމަޖެހިފައިވާ 20 ވަނަ މަޖިލިސް އިންތިހާބުގައި ވާދަކުރުމުގެ ފުރުސަތު މި މަހު 30 ގައި ހުޅުވާލުމަށް އިލެކްޝަން ކޮމިޝަން (އީސީ) އިން ނިންމައިފިއެވެ. 

އީސީގެ ނައިބު ރައީސް އިސްމާއިލް ހަބީބް އެކްސް ގައި ކުރި ޕޯސްޓެއްގައި ބުނީ އިންތިޚާބު ގައި ވާދަކުރުމަށް ކުރިމަތިލުމުގެ ފުރުސަތު 30 ޖެނުއަރީން 14 ފެބްރުއަރީ އަށް ހުޅުވާލާނެ ކަމަށެވެ.

މި އިންތިހާބު ބޭއްވުމަށް ހަމަޖެހިފައިވަނީ މި އަހަރުގެ މާޗު މަހުގެ 17 ވަނަ ދުވަހުއެވެ. މިއީ ރޯދަ މަހުގެ 7 ވަނަ ދުވަސްކަން ފާޙަގަ ކޮށްލެވެއެވެ.

އީސީއިން ވަނީ މި އިންތިހާބުގައި ވޯޓު ލެވޭ މީހުންގެ ވަގުތީ ލިސްޓް އިއްޔެ އާންމުކޮށްފައެވެ. މި ލިސްޓްގައި ވާ ގޮތުން  284،327 މީހަކަށް ވޯޓް ލުމުގެ ހައްގު ލިބިފައި ވެއެވެ. މިއީ މަޖިލިސް އިންތިހާބު އޮންނަ ދުވަހާއި ހިސާބަށް 18 އަހަރު ފުރޭ 139،165 އަންހެންނާއި 145،162 ފިރިހެނުންނެވެ.

މި މަހުގެ 21 އާއި ހިސާބަށް މި ލިސްޓަށް ޝަކުވާ ހުށައެޅުމަށް އެ އިދާރާއިން މިހާރު ވަނީ ހުޅުވާލާފައެވެ.