ދިވެހިރާއްޖެއާއި ޓައިވާނާއި ދެމެދު އެއްވެސް ބާވަތެއްގެ ރަސްމީ ގުޅުމެއް ނުބޭއްވުމަށް ނިންމައި ރާއްޖެއާއި ޗައިނާއާއި ދެމެދު އެއްބަސް ވެއްޖެއެވެ.
ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސް މުއިއްޒު ޗައިނާއަށް މިހާރު ކުރައްވަމުން ގެންދަވާ ދަތުފުޅުގައި ދެފަރާތުން އެއްބަސްވާ ކަންކަމާއި ގުޅޭގޮތުން ރައީސް އޮފީހުން ނެރުއްވި ޖޮއިންޓް ޕްރެސް ކޮމިއުނިކޭޝަންގައި މިކަން ހާމަކޮށް ބުނެފައިވަނީ، ރާއްޖޭގެ ޤައުމީ ސިޔާދަތާއި، މިނިވަންކަމާއި، ޤައުމީ ކަރާމާތް ދެމެހެއްޓުމުގައި، ރާއްޖެއަށް ބޭނުންވާ ޤައުމިއްޔަތު ގެނެސްދިނުމުގައި ޗައިނާއިން އެހީތެރިކަން ފޯރުކޮށް ދިނުމާއެކު، ރާއްޖޭގެ ދާޚިލީ ކަންކަމަށް ބޭރުގެ ނުފޫޒު ފޯރުވުމާ ޗައިނާއިން ދެކޮޅު ހަދާނެ ކަމަށެވެ.
އަދި އޭގެ އިތުރުން "ވަން-ޗައިނާ" ސިޔާސަތު ޤަބޫލުކޮށް، މުޅި ޗައިނާ ތަމްސީލުކުރާ ހަމައެކަނި ޤާނޫނީ ސަރުކާރަކީ ޗައިނާ ސަރުކާރުކަމަށް ގަބޫލުކޮށް، ޓައިވާނަކީ ޗައިނާގެ ސަރަޙައްދުގެ ވަކިނުކުރެވޭނެ ބައެއްކަން ޤަބޫލުކޮށް، އެއްޗައިނާ ސިޔާސަތަަށް ތާއީދުކުރުންމަތީ ދިވެހިރާއްޖެއިން ސާބިތުވެ ދެމި އޮންނާނެ ކަމުގައި އެއްބަސްވެފައިވާކަމަށް މި ޖޮއިންޓް ޕްރެސް ކޮމިއުނިކޭޝަންގައި ހާމަކޮށްފައިވެއެވެ.
އެގޮތުން ޗައިނާގެ ސިޔާދަތާއި ސަރަހައްދީ އެއްބައިވަންތަކަމަށް އުނިކަން އަންނަ ފަދަ އެއްވެސް ވާހަކައެއް ނުވަތަ އަމަލަކާ ރާއްޖެއިން ދެކޮޅު ހެދުމުގެ އިތުރުން، "ޓައިވާންގެ މިނިވަންކަން" ކަމާއި، އެގައުމުން ވަކިވެގަތުމުގެ ހިންގާ ހުރިހާ ހަރަކާތަކާ ދެކޮޅު ހެދުމާއެކު ޓައިވާނާ އެކު އެއްވެސް ބާވަތެއްގެ ރަސްމީ ގުޅުމެއް ނުބާއްވާނެ ކަމަށް ރާއްޖެއިން ވަނީ އެއްބަސްވެފައެވެ.
އަދި ޗައިނާގެ ދާޚިލީ ކަންކަމަށް ބޭރުގެ ނުފޫޒު ފޯރުވުމާ ރާއްޖެއިން ދެކޮޅު ހެދުމާއެކު، ޗައިނާގެ ގައުމީ އެއްބައިވަންތަކަން ހާސިލްކުރުމަށް ޗައިނާއިން ކުރާ ހުރިހާ މަސައްކަތަކަށް ރާއްޖެއިން ތާއީދު ކުރުމަށްވެސް ދެފަރާތުން އެއްބަސް ވެފައިވާކަމަށްވެސް ރައީސް އޮފީހުން ނެރެފައިވާ މި ޖޮއިންޓް ޕްރެސް ކޮމިއުނިކޭޝަންގައި ވަނީ ބުނެފައެވެ.
ރާއްޖޭގެ ދާޚިލީ ކަންކަމަށް ބޭރުގެ ނުފޫޒު ފޯރުވުމަށް ޗައިނާއި ދެކޮޅު ހަދާނެ ކަމަށާއި، ދެގައުމުގެ މައިގަނޑު މަސްލަހަތު ޙިމާޔަތްކުރުމުގައި އެއްގައުމު އަނެއް ގައުމަށް ހަރުދަނާ ގޮތެއްގައި އެއްބާރުލުން ދިނުމުގައި ދެމިތިބުމަށް ޗައިނާއާއި ރާއްޖެއިން ވަނީ އެއްބަސް ވެފައެވެ.
Advertisement
This content is created and paid for by advertisers and does not involve Voice Journalists
