ޗައިނާއާއި ރާއްޖެއާއި ދެމެދު 2017 ވަނަ އަހަރު ސޮއިކުރެވިފައިވާ މިނިވަން ވިޔަފާރީގެ އެއްބަސްވުމުގެ ދަށުން އެއްވެސް ޑިއުޓީއަކާ ނުލައި ސީފުޑް ނުވަތަ މަހުގެ 296 ބާވަތެއް ޗައިނާއަށް އެތެރެކުރުމުގެ ފުރުޞަތު ދިވެހިރާއްޖެއަށް ފަހިވެގެންދާނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ދައުލަތުގެ މީޑިޔާ ޕީޢެސްއެމަށް ދެއްވި ބަސްދީގަތުމެއްގައި އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވީ ޗައިނާއާއި ދެމެދު ވެފައިވާ މިނިވަން ވިޔަފާރީގެ އެއްބަސްވުމުގެ ދަށުން ވިޔަފާރީގެ ގިނަ ރޮނގުތަކުން ރާއްޖެއަށް ފަހި ފުރުސަތުތަކެއް ލިބިގެން ދާނެކަމަށެވެ. އޭގެ ތެރެއިން އެންމެ ޚާއްސަ އެއް ފުރުސަތުގެ ގޮތުގައި ވަޒީރު ފާހަގަކުރެއްވީ، މަހުގެ ބާވަތްތައް އެކްސްޕޯޓުކުރުމާއި ރީ އެކެކްސްޕޯޓު ކުރުމުގެ ފުރުޞާތު ލިބިގެންދިއުމެވެ.
އެގޮތުން 269 ބާވަތެއްގެ މަހުގެ ބާވަތްތައް ޗައިނާއަށް އެކްސްޕޯޓް ކުރުމުގެ ފުރުސަތު ރާއްޖެއަށް ލިބިގެންދާނެކަން ފާހަގަކުރައްވައި ވަޒީރު ވިދާޅުވީ، މަހުގެ 296 ބާވަތް ރާއްޖެއިން ލިބެން ނެތް ކަމުގައިވިޔަސް އަމާޒަކީ ރާއްޖެއިން ނުލިބޭ މަހުގެ ބާވަތްތައް ރާއްޖެ އެތެރެކޮށް އެތަކެތި އިމްޕޯޓް ކުރުންކަމުގައެވެ.
296 ބާވަރުގެ ސީފުޑް ރާއްޖޭގައި ނުހުރެދާނެ. އަޅުގަނޑުމެންގެ އަމާޒަކީ ރާއްޖެއިން ނުލިބޭ ސީފުޑް އިމްޕޯޓްކުރުން. އަދި ރާއްޖެއިން ރީއެކްސްޕޯޓް ކުރުން. 10% އާއި 30% ވެލިއު އެޑިޝަނެއް ހަދަން މިޖެހެނީ. ރާއްޖެއިން ރީއެކްސްޕޯޓްކުރުން އެއީ ޗައިނާއާއެކު ކުރެވޭނެ މަސައްކަތެއް. މިިހާރުވެސް "ގްރޫޕާ" ހުއިފިލަނޑާ، އަދި ކޮންމެވެސްވަރަކަށް ޔެލޯފިން ޓޫނާ އެތެރެކުރޭ. އެކަންކަން ފުޅާކުރުން. އެއީ ފްރީޓްރޭޑުގެ ތެރެއިން ލިބޭ ވަރަށް ފަހި ފުރުޞަތެއް
މުޙައްމަދު ސަޢީދު
މީގެ އިތުރުން މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއިން ޗައިނާގެ ހުރިހާ މަންޒިލަކަށް ވައިގެ ދަތުރުފަތުރުކުރުމުގެ ފުރުޞަތު ލިބިގެންދާނެ ކަން ފާހަގަ ކުރައްވައި ވަޒީރު ވަނީ އެއީ ރާއްޖެއަށް އަންނަ ފަތުރުވެރިން އިތުރުކުރުމަށް ލިބޭ ރަނގަޅު ފުރުޞަތެއްގެ ގޮތުގައި ސަޢީދު ފާހަގަކުރައްވައިފައެވެ.
މީގެ އިތުރުން ވަޒީރު ވިދާޅުވީ ޤައުމީ އެއަރލައިނަށް ވައިޑްބޮޑީ އެއަރކްރާފްޓް ހޯއްދެއްވުމަށް ރައީސުލްޖުމްހޫރިއްޔާ ނިންމެވީވެސް އެފަދަ އޮޕަރޭޝަންތަކެއް ފެއްޓެވުމަށްކަމަށެވެ.
އެހެންވީމަ އަޅުގަނޑުމެންގެ އޯން އެއަރލައިނެއް، މިސާލަކަށް ޤައުމަށް ފަތުރުވެރިން ގެނައުމުގެ މަސައްކަތް ކުރާ ވަގުތެއްގަ ފްރީޓްރޭޑް އެގްރީމެންޓެއް އައިމަވާގޮތަކީ އިތުރަށް ދަތުރުތައް ފަހިކުރަން ފަސޭހަވެގެންދާނެ. އަޅުގަނޑުމެންނަށް އެބަލިބޭ އެހެން ފުރުޞަތެއްވެސް. އެއީ ޗައިނާގެ އެއްމަންޒިލުން އެހެން މަންޒިލަށް މީހުން ގެންދިއުން. އެއީ މިތަނުން އެހެން ބަޔަަށް ދޭ ޚިދުމަތެއް ނޫން. ދިވެހި ރާއްޖެއަށް އެކަނި. ރާއްޖެއަށް އެކަނި ޗައިނާގެ އެއް ސިޓީން އަނެއްސިޓީއަށް މީހުން އުފުލުމަށް މި ހުއްދަދެނީ. އެއީ އެންމެ ވަރުގަދަ އެއް މަސައްކަތް
މުޙައްމަދު ސަޢީދު
އަދި ދިވެހި ކުންފުނިތަކަށް ޗައިނާގައި އެޤައުމުގެ ކުންފުނިތަކުގެ ގޮތުގައި ހިންގުމުގެ ފުރުޞަތުވެސް އެ އެއްބަސްވުމުގެ ދަށުން ލިބިގެންދާނެކަމަށާއި ނަމަވެސް ރާއްޖޭގައި ޑޮމެސްޓިކް އެއަރލައިންތަކާއި ވިޔަފާރިތައް ކުރާނީ ދިވެހިންކަމަށް ވަޒީރު ސަޢީދު ވިދާޅުވިއެވެ.
މިއީ ރާއްޖެއަށް ފައިދާވާގޮތަށް އެކުލަވާލެވިފައިވާ މުހިންމު އެއްބަސްވުމެއްކަމަށްވެސް ވަޒީރު ވިދާޅުވިއެވެ.
އެއީ ދުނިޔޭގެ އެންމެ ވަރުގަދަ، އެންމެ ކުރިއަރާފައިވާ އިޤްތިޞާދާއެކުވެސް އެންމެ ކުޑަ އިޤްތިޞާދަށްވެސް ފުރުޞަތު އޮތްކަން ހާމަކޮށްދޭ އެއްބަސްވުމެއްގެ ގޮތުގައި ވަޒީރު ސިފަކުރެއްވިއެވެ.
ޗައިނާއާއެކު ވެފައިވާ މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމަށް މިސަރުކާރު އޮތީ ތައްޔާރަކަށް ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވަނީ ޗައިނާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ޗައިނާގައި ބޭއްވި އިންވެސްޓް މޯލްޑިވްސް ފޯރަމުގައެވެ.
Advertisement
This content is created and paid for by advertisers and does not involve Voice Journalists
