ޗައިނާގެ ރައީސްގެ ޚާއްޞަ ދައުވަތަކަށް އެ ޤައުމަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ދެކަނބަލުން މިއަދު މާލެ ވަޑައިގެން ވެލާނާ އިންޓަރނޭޝަނަލް އެއަރޕޯޓްގައި ނޫސްވެރިންނާއި ބައްދަލު ކުރެއްވުމަށް ނިންމަވައިފިއެވެ. 

މިއަދު 15:15 ގައި ވެލާނާ އިންޓަރނޭޝަނަލް އެއަރޕޯޓްގެ ވީއައިޕީ ލޯންޖްގައި ކުރިއަށް ގެންދިއުމަށް ހަމަޖެހިފައިވާ މި ބައްދަލު ކުރެއްވުމުގައި ރައީސް ޑރ މުއިއްޒުގެ ޗައިނާ ދަތުރުފުޅުގައި މަޝްވަރާކުރެވުނު އަދި ދެ ގައުމުގެ ދެމެދުގައި އެއްބަސްވެވުނު މުހިއްމު ކަންކަމާއި ގުޅޭގޮތުން މައުލޫމާތު ދެއްވާނެ ކަމުގައި ރައީސް އޮފީހުން ވިދާޅުވެއެވެ. 

ރައީސް ޗައިނާއަށް ކުރެއްވި ދަތުރުފުޅު ފާހަގަ ކޮށްލެވެނީ ދެ ގައުމުގެ ދެމެދުގައި މުހިއްމު ގިނަ ކަންކަމާކާއި ގުޅޭ ގޮތުން މަޝްވަރާ ކުރެވި އެއްބަސްވުންތަކުގައި ސޮއި ކުރެއްވި ދަތުރުފުޅަކަށެވެ. 

އެގޮތުން މި ދަތުރުފުޅުގެ އެންމެ ޚާއްސަ އެއް ކަމެއްގެ ގޮތުގައި ފާހަގަ ކުރެވުނު "އިންވެސްޓް މޯލްޑިވްސް" ގައި ޗައިނާއިން އެކަނިވެސް ވަނީ 300 އަށްވުރެ ގިނަ އިންވެސްޓަރުން ބައިވެރިވެފައެވެ. 

މި ފޯރަމްގައި ވާހަކަފުޅު ދައްކަވަމުން ރައީސް ޑރ މުއިއްޒު ވަނީ ޗައިނާގެ އިންވެސްޓަރުންނަށް ރާއްޖޭގައި އިންވެސްޓްކުރުމަށް ހުރި ފަހި ފުރުސަތުތަކާއި ގުޅޭގޮތުން މައުލޫމާތު ހިއްސާ ކުރައްވައިފައެވެ. 

މީގެ އިތުރުން ރާއްޖެއާއި ޗައިނާއާއި ދެމެދު ވެވުނު މިނިވަން ވިޔަފާރީގެ އެއްބަސްވުމަށް އަމަލުކުރަން ފެށުމަށް ރާއްޖެއިން ތައްޔާރަށް އޮތްކަންވެސް ރާއީސްގެ ވާހަކަފުޅުގައި ވަނީ ހާމަކުރައްވައިފައެވެ.

މީގެ އިތުރުން މި ސަރުކާރުގެ ބޯހިޔާވަހިކަމުގެ އެންމެ ބޮޑު މަޝްރޫއުގެ ދަށުން ހިއްކަމުންދާ ރަސްމާލޭގައި ޗައިނާ ސަރުކާރުގެ އެހީގައި 30،000 ހައުސިން ޔުނިޓް އެޅުމަށްވެސް ދެ ގައުމުގެ ދެމެދުގައި ވަނީ އެއްބަސްވެފައެވެ. 

އަދި ޗައިނާ ސަރުކާރުގެ ހިލޭ އެހީގައި ވިލިމާލެގައި 100 އެނދުގެ ހޮސްޕިޓަލެއް އެޅުމަށް ނިންމާފައިވާއިރު ޗައިނާ ސަރުކާރުން ވަނީ ރާއްޖެއަށް 1000 ސްކޮލާޝިޕް ދިނުމަށްވެސް ނިންމާފައެވެ. 

މީގެ އިތުރުންވެސް ގިނަ ކަންކަމާކާއި ގުޅިގެން ދެ ގައުމުގެ ދެމެދުގައި އެއްބަސްވުންތަކެއް ހެދިފައިވާއިރު އެކަމާއި ގުޅޭ މުހިއްމު މައުލޫމާތުތައް މިއަދު ރައީސް ޑރ މުއިއްޒު ހިއްސާ ކުރައްވާނެއެވެ. 

މި ދަތުރުފުޅުގައި ރައީސް ޑރ މުހައްމަދު މުއިއްޒު ވަނީ ޗައިނާގެ ރައީސަށް ރާއްޖެ ވަޑައިގަތުމުގެ ދައުވަތުވެސް އަރުވައިފައެވެ.