ކުރިއަށް އޮތް 20 ވަނަ ރައްޔިތުންގެ މަޖިލިސް އިންތިހާބު ގައި އެމްޑީޕީގެ ފަރާތުން ވާދަކުރާ ކެންޑިޑޭޓުން ހޮވުމަށް ބާއްވާ ޕްރައިމަރީ އިންތިހާބު، އަންނަމަހުގެ 3 ގައި ބޭއްވުމަށް އެ ޕާޓީން ނިންމައިފި އެވެ.

އެމްޑީޕީން އެކަން ހާމަކޮށްފައިވަނީ އެކަމާއި ގުޅޭގޮތުން އެޕާރޓީން މިއަދު ކުރި އިޢުލާނެއްގައެވެ. އެ އިޢުލާނުގައި ބުނެފައިވަނީ އެ ޕާރޓީގެ ފަރާތުން 20 ވަނަ ރައްޔިތުންގެ މަޖިލިސްއަށް ވާދަކުރަން ބޭނުންފުޅުވާ ފަރާތްތަކުން ޝައުޤުވެރިކަން ފާޅުކުރުމަށް ކުރި އިއުލާނާއި ގުޅިގެން ޝައުޤުވެރިކަންފާޅުކުރި ފަރާތްތަކުގެ ތެރެއިން ޕްރައިމަރީ ބާއްވަންޖެހޭ ދާއިރާތަކާއި، އެދާއިރާތަކަށް ކުރިމަތިލެއްވި ކެންޑިޑޭޓުންގެ ނަންތައް ކެންޑިޑޭޓް ނަންބަރާއިއެކު އާއްމުކޮށް އެންގުމަށްޓަކައި އިއުލާންކުރީކަމަށެވެ.

އެމްޑީޕީން ކުރި މި އިއުލާނުގައިވާ ގޮތުން 43 ދާއިރާއަކުން އެ ޕާޓީގެ ޕްރައިމަރީ ބާއްވާނެ އެވެ. ބާކީ ހުރި ދާއިރާތަކުގެ ތެރެއިން އެމްޑީޕީގެ ޓިކެޓުގައި ވާދަކުރަން ހުޅުވައިލި ފުރުސަތުގައި އެއް ކެންޑިޑޭޓަކު ކުރިމަތި ލާފައިވާތީ ޕްރައިމަރީއަކާއި ނުލައި 35 ކެންޑިޑޭޓަކަށް ވަނީ ޓިކެޓު ކަށަވަރު ވެފައެވެ. ޓިކެޓް ކަށަވަރު ވެފައިވާ ފަރާތްތަކުގެ ނަންތަކާއި އެފަރާތްތައް ވާދަކުރާ ދާއިރާތައް ވަނީ  އެޕާރޓީން ކުރިން އިޢުލާނު ވެސް ކޮށްފައެވެ.

ކުރިއަށް އޮތް 20 ވަނަ ރައްޔިތުން މަޖިލިހަށް ވާދަކުރުމަށް ޕާރޓީތަކުގެ ޓިކެޓް ހޯދުމަށްޓަކައި އެކި ފަރާތްތަކުން ދަނީ މިހާރުން ފެށިގެން ވަރަށް ބޮޑަށް މަސައްކަތް ކުރަމުންނެވެ.

އީސީން އިޢުލާނު ކޮށްފައިވާ ގޮތުގައި 20 ވަނަ ރައްޔިތުންގެ މަޖިލިސް އިންތިހާބު އޮންނާނީ އަންނަ މާރޗު މަހުގެ 17 ވަނަ ދުވަހުއެވެ.