ދިވެހިރާއްޖެއިން ތައިވާނާއި ރަސްމީ އެއްވެސް ގުޅުމެއް ނުބާއްވާނެ ކަމަށާއި ރާއްޖެއިން ގަބޫލުކުރަނީ ވަން ޗައިނާ ސިޔާސަތު ކަމަށް ސަރުކާރުން ވިދާޅުވެއްޖެއެވެ.
ތައިވާނުގެ ރިޔާސީ އިންތިހާބާއި ގުޅުވައިގެން ދިވެހި ސަރުކާރުން ނެރުނު ނޫސްބަޔާނެއްގައި ވަނީ، ތައިވާނުގެ ރިޔާސީ އިންތިޚާބު ބާއްވާފައިވަނީ އިންތިޚާބު ބާއްވައިފިނަމަ ނުތަނަވަސްކަން ބޮޑުވާނެ ކަމަށް ޗައިނާއިން ބުނެފައިވާ ދަނޑިވަޅެއްގައިކަމަށެވެ.
އެގޮތުން ދިވެހި ސަރުކާރުގެ ބަޔާނުގައި ވިދާޅުވީ ވަން ޗައިނާ ސިޔާސަތަށް ރާއްޖެއިން ފުރިހަމައަށް ތާއީދު ކުރާ ކަމަށާއި ރާއްޖެއާއި ޗައިނާގެ ގުޅުން ބިނާވެފައިވަނީވެސް އެއަސާސްގެ މައްޗަށް ކަމަށެވެ. އަދި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރެއްވި ފުރަމާނަ ދަތުރުފުޅުގައިވެސް އެޔަގީންކަން އެމަނިކުފާނު ޗައިނާއަށް ދެއްވާފައިވާނެ ކަމަށް ވެސް އެ ބަޔާނުގައި ވެއެވެ.
އެގޮތުން ދުނިޔޭގައި އޮތީ އެންމެ ޗައިނާއެއް ކަމަށާއި މުޅި ޗައިނާ ރަމްޒުކޮށްދޭ ދައުލަތަކީ ޕީޕަލްސް ރިޕަބްލިކް އޮފް ޗައިނާ ކަމަށް ވިދާޅުވެ ސަރުކާރުގެ ބަޔާނުގައި ވިދާޅުވީ، ދިވެހިރާއްޖެއިން ގަބޫލުކުރާނީ ތައިވާނަކީ ޗައިނާގެ ޓެރިޓަރީގެ ބައެއް ކަމުގައި ކަމަށެވެ.
އެގޮތުން ދިވެހިރާއްޖެއިން ތައިވާނާއެކު އެއްވެސް ގުޅުމެއް ނުބާއްވާނެ ކަމުގެ ޔަގީންކަން ދެއްވަމުން ސަރުކާރުން ވަނީ ވަކިވެގަތުމަށް ތައިވާނުން ހިންގާ އަމަލުތަކާ ދެކޮޅުކަމަށް ވިދާޅުވެފައެވެ.
އަދި ޗައިނާގެ ދާޚިލީ ކަންކަމުގެ ތެރެއަށް ބޭރުގެ ނުފޫޒު ފޯރުވުންވެސް ރާއްޖެއިން ދެކޮޅު ކަމަށް ބަޔާނުގައި ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
