ރައްޔިތުންގެ މަޖިލީހުގެ އިންތިޚާބުގައި ވާދަކުރާ މީހުންގެ ކުށުގެ ރެކޯޑު ސާފުކޮށްދިނުން ޕްރޮސެކިއުޓާ ޖެނެރަލް (ޕީޖީ) އޮފީހުން ފަސޭހަކޮށްދީފި އެވެ.

އެގޮތުން ޕީޖީ އޮފީހުން މިއަދު ބުނީ، މަޖިލީހަށް ކުރިމަތިލާ މީހަކީ ކުށުގެ ރެކޯޑެއް ނެތް މީހަކުނަމަ، އެމީހަކު ރެކޯޑަށް އެދޭތާ 5 މިނިޓު ތެރޭގައި ރެކޯޑު ސާފުކޮށްދޭނެ ކަމަށެވެ. އަދި އެ މީހާގެ ރެކޯޑެއް އޮތްނަމަ، އެއް ދުވަހުގެ ތެރޭގައި ކުށުގެ ރެކޯޑު ސާފުކޮށްދޭނެ ކަމަށްވެސް ބުނެފައިވެއެވެ. 

މިއާއެކު ޕީޖީ އޮފީހުން ބުނީ، ރިކޯޑް ސާފުކުރަމުގެ މަސައްކަތް ކުރިއަށްދާއިރު އިތުރު މައްސަލައެއް ދިމާވެއްޖެނަމަ، އެމައްސަލައެއް ޙައްލުކޮށްގެން ކުރިއަށް ގެންދާނެ ކަމަށެވެ. 

Advertisement

އަދި އެކަމާބެހޭ އެއްވެސް ސުވާލެއް އޮތްނަމަ، ޕީޖީ އޮފީހުގެ ނަންބަރު 3000655 އާ ގުޅުއްމަށް އެދެމުން އެ އޮފީހުން ވަނީ، ކުށުގެ ރެކޯޑު ސާފުކޮށްދިނުމުގައި ޢަމަލުކުރާގޮތް، މިލިންކުން ފެންނާނެ ކަމަށް ބުނެފައެވެ.  

އިލެކްޝަންސް ކޮމިޝަނުން ބުނެފައިވާ ގޮތުގައި ރައްޔިތުންގެ މަޖިލީހުގެ އިންތިހާބަށް ކުރިމަތިލުމަށް އެދޭ މީހާ ފުރިހަމަ ކުރަންޖެހޭ ކުށާއި، ދަރަނީގެ ރެކޯޑަކީ މިދިޔަ ޑިސެމްބަރު މަހުގެ 14 ގެ ފަހުން ޑީޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުންނާއި، މޯލްޑިވްސް ކަރެކްޝަނަލް ސާރވިސަސް އިން ފުރިހަމަކޮށްފައިވާ ރެކޯޑަކަށް ވާންޖެހެއެވެ.  

20 ވަނަ ރައްޔިތުންގެ މަޖިލީހަށް މެންބަރުން އިންތިހާބުކުރުމަށް ބާއްވާ އިންތިޚާބު އޮންނާނީ އަންނަ މާރޗްމަހުގެ 17 ވަނަ ދުވަހު އޮންނަ އިރު، މަޖިލީހަށް ކުރިމަތި ލުމުގެ ފުރުސަތު މިމަހު ހުޅުވާލާނެ ކަމަށް އީސީން ބުނެއެވެ. 

އިލެކްޝަން ކޮމިޝަނުން އައްމުކޮށްފައި މައުލޫމާތުން އެނގޭ ގޮތުގައި މަޖިލިސް އިންތިޚާބުގައި ވޯޓުލުމުގެ ޙައްޤު 284،327 މީހުންނަށް ލިބިފައިވެއެވެ. އޭގެ ތެރޭގައި ހިމެނެނީ 139،165 އަންހެނުންނާއި، 145،162 ފިރިހެނުންނެވެ. މިއީ މިދިޔަ އަހަރު ބޭއްވި ރިޔާސީ އިންތިޚާބުގައި ވޯޓުލުމުގެ ޙައްޤު ލިބުނު މީހުންނަށް ވުރެ 1523 މީހުން އިތުރު އަދަދެކެވެ. ރިޔާސީ އިންތިޚާބުގެ ދެވަނަ ބުރުގައި ވޯޓު ލުމުގެ ޙައްޤު ލިބިފައިވަނީ 282,804 މީހުންނަށެވެ.