ވާރެވެހި ހުޅުމާލެ ސަހަރާގައި ފެންބޮޑުވުމުގެ މައްސަލަ ހައްލުކުރުމަށް މާލެ ސިޓީ ކައުންސިލުން ނިންމައިފިއެވެ.

އެގޮތުން ހުޅުމާލޭ ސަހަރާގައި ފެންބޮޑުވެ މީހުން ވަޅުލުމަށް ދަތިވާ މައްސަލަ ހައްލުކުރުމަށް ދޮޅުފޫޓަށް ވެލި އަޅައި، ޑްރެއިން ސިސްޓަމެއް ގާއިމްކުރުމަށް އެ ކައުންސިލުން ވަނީ ނިންމާފައެވެ.

މާލެ ސިޓީ ކައުންސިލުން މިދިޔަ ބުރާސްފަތި ދުވަހު ބޭއްވި ކައުންސިލް ބައްދަލުވުމުގައި މި މައްސަލަ ހައްލު ކުރުމަށް ހުށަހެޅުއްވީ، ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު އެވެ. ޝުޖާއު ހުށައެޅުއްވި މިމައްސަލައިގައި ވަނީ ފެންބޮޑުވާ މައްސަލަ ހައްލުކުރުމަށް ޑްރެއިން ސިސްޓަމެއް ގާއިމް ކުރުމަށް ހުށައަޅާފައެވެ. އެއާއިއެކު މި މައްސަލަ ހައްލުކުރުމަށް މައްޗަންގޮޅި މެދު ދާއިރާގެ ކައުންސިލަރު އަހުމަދު ޒަމީރު ވަނީ އެ ސަހަރާ އަށް ދޮޅު ފޫޓަށް ވެލި އެޅުމަށް ހުށަހަޅުއްވާފަ އެވެ.

ހުޅުމާލެ ސަހަރާގައި ފެންބޮޑުވާ މައްސަލަ ހައްލުކުރުމަށް ނިންމި ކަންތައްތައް ފާސް ކުރުމަށް ކަނޑައެޅީ މާލެ ސިޓީ ކައުންސިލްގެ ހުރިހާ ކައުންސިލުންގެ ވެސް އިއްތިފާގުންނެވެ.

މި ބައްދަލުވުމުގައި ހުޅުމާލެ ސަހަރާ މިހާރަށްވުރެ ތަރައްގީ ކުރުމަށް ރާވައި، ކަންތައްތަކެއް ވަނީ ނިންމާފައެވެ. މިގޮތުން ހުޅުމާލޭ ސަހަރާގައި ދެ ފާހާނާ ބަރި އެޅުމަށާއި، ފީޑިން ރޫމެއް އިތުރުކުރުމަށާއި، ހިނަވާ ގެތަކުގެ އޮޅިގަނޑު މަރާމާތުކުރުމުގެ އިތުރުން ވީލްޗެއާގައި މައްޔިތާގެ މޫނު ބެލުމާއި ކަށުނަމާދަށް ވަދެވޭނެ ނިޒާމެއް ގާއިމުކުރުމަށް ވެސް ވަނީ ފާސްކޮށްފައެވެ.

ދާދި ފަހުން މާލެ އަށް ވެހުނު ވިއްސާރައިގައި ހުޅުމާލެ ސަހަރާގައި ފެންބޮޑުވެ، ސަހަރާގެ ބިމު އަޑިން ފެންގަނޑު ނުހިނދޭތީ، މައްޔިތުން ވަޅުލުން ވަނީ މާލެ އާސަހަރާއަށް ދެ ފަހަރެއްގެ މަތިން ބަދަލު ކޮށްފައެވެ.