ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ފެނުމުގެ ނުކުޅެދުންތެރިކަން ހުންނަ މީހަކު، އެހެން މީހެއްގެ އެހީތެރިކަމާ ނުލައި ވޯޓު ކަރުދާހުގައި ފާހަގަ ޖެހުމަށްޓަކައި، ޓެމްޕްލޭޓް ބޭނުން ކޮށްގެން ވޯޓުލާން ރެޖިސްޓަރ ވުމުގެ ފުރުސަތު ހުޅުވާލައިފިއެވެ. 

މިކަމާއި ގުޅޭގޮތުން އިލެކްޝަންސް ކޮމިޝަން، އީސީން ކުރި އިއުލާނެއްހައި ބުނީ، 2024 މާރިޗު 17 ވާ އާދީއްތަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ފެނުމުގެ ނުކުޅެދުންތެރިކަން ހުންނަ މީހަކު، އެހެން މީހެއްގެ އެހީތެރިކަމާ ނުލައި ވޯޓު ކަރުދާހުގައި ފާހަގަ ޖަހައިގެން ވޯޓުލުމުގެ އިންތިޒާމް ހަމަޖެއްސުމުގެ ގޮތުން އެފަރާތްތައް ރަޖިސްޓަރީކުރުމުގެ ފުރުޞަތު މިހާރު ހުޅުވާލައިފައިވާ ކަމަށެވެ. 

އެހެންކަމުން، ފެނުމުގެ ނުކުޅެދުންތެރިކަން ހުންނަ ފަރާތްތަކަށް ވޯޓުލުމަށް ބޭނުންވާ އިންތިޒާމްތައް ހަމަޖެއްސުމުގެ ގޮތުން ޓެމްޕްލޭޓް ބޭނުންކޮށްގެން ވޯޓުލުމަށް އެދޭ ފަރާތްތައް 2024 ޖެނުއަރީ 21 ވާ އާދީއްތަ ދުވަހުން ފެށިގެން 2024 ފެބުރުވަރީ 4 ވާ އާދީއްތަ ދުވަހުގެ ނިޔަލަށް، 1414 އަށް ގުޅައިގެން ރަޖިސްޓަރީކުރުމަށް އެ އިދާރާއިން ވަނީ އެދިފައެވެ.

އީސީން 1414 ގެ ޚިދުމަތްދޭ ވަގުތުތަކަކީ ރަސްމީ ދުވަސްތަކުގެ ހެނދުނު 8:00 އިން ރޭގަނޑު 10:00 އަށް، ރަސްމީ ބަންދު ދުވަސްތަކުގައި ހެނދުނު 9:00 އިން ރޭގަނޑު 10:00 އަށް އަދި ހުކުރު ދުވަހުގެ މެންދުރުފަހު 3:00 އިން ހަވީރު 6:00 ގެ ނިޔަލަށެވެ.

ފެނުމުގެ ނުކުޅެދުންތެރިކަން ހުން ފަރާތްތަކަށް، އެހީތެރިއަކާއި ނުލައި، ޓެމްޕްލޭޓް ބޭނުންކޮށްގެން އަމިއްލައަށް ވޯޓުލުމުގެ ފުރުސަތު އެންމެ ފުރަތަަމަ ލިބިގެން ދިޔައީ ނިމިދިޔަ ރިޔާސީ އިންތިޚާބުގައެވެ. 

ލޯފަން މީހުން ވޯޓުލުމަށް ރިޔާސީ އިންތިހާބުގައި ތައްޔާރުކުރި ޕްލާސްޓިކް ހާއްސަ ޓެމްޕްލޭޓު-- ފޮޓޯ/ މަޖިލިސް

އެ ފުރުސަތު އެފަރާތްތަކަށް ފަހިވެގެންދިޔައީ, އެފަދަ ފަރާތްތަކުގެ ހައްގުގައި މަސައްކަތް ކުރާ، ބްލައިންޑް އެސޯސިއޭޝަންގެ ބޭފުޅުން، ސިޔާސީ ޕާޓީ ތަކާއި، އީސީ އާއި ސަރުކާރުގެ ކަމާއި ގުޅޭ އިދާރާ ތަކާއި ބައްދަލުކޮށް ކުރި މަސައްކަތާއި އެކު، މަޖިލީހުގެ ތެރެއިން، އިންތިޚާބާއި ގުޅޭ ގާނޫނަށް ބަދަލުގެނެވިގެންނެވެ. 

ކުރިއަށް އޮތް މަޖިލިސް ވެގެންދާނީ، ލޮލަށް ފެނުމުގެ ނުކުޅެދުންތެރިކަން ހުންނަ ފަރާތްތަކަށް އެހެން މީހެއްގެ އެހީއާއި ނުލައި ވޯޓުލެވޭ ފުރަތަމަ މަޖިލިސް އިންތިޚާބަށެވެ.