ދިވެހި ސަގާފަތާއި ތަރިކަ އާއި ބެހޭ ވުޒާރާއިން, ކަޅުއޮށްފުންމީގެ ނަކަލު ރޭ މާލެ ގެނެސްފިއެވެ.

ކަޅުއޮށްފުންމީގެ ނަކަލު މުދާ އުފުލާ ބާޖެއްގައި ރޭ އެއް ނަންބަރު ފާލަމަށް ގެނެސްފައިވާއިރު, އެ ދޯނި ބާއްވާނެ އޮޑި ހަރުގެ އަޅަން ނިންމާފައިވަނީ މިހާރު ކަޅުވަކަރު މިސްކިތް ވެސް ހުރި މައިދާނުގައެވެ.

އަދި އެތަނުގައި ބޭއްވުމަށްފަހު، އެ ދޯނި ބަލާލުމުގެ ފުރުސަތު އެންމެނަށް ހުޅުވާލަން ނިންމާފައިވާއިރު، އެ ދޯނި ބާއްވާ ތަނުން، އައްސުލްތާނުލްޣާޒީ މުހައްމަދު ތަކުރުފާނުލްއައުޒަމް ކުރެއްވި މިނިވަންކަމުގެ ޖިހާދާ ބެހޭ މައުލޫމާތު ލިބޭނެ އިންތިޒާމުތައް ހަމަޖެއްސުމަށް ވެސް ވަނީ ނިންމާފައެވެ. 

ކަޅުއޮށްފުންމި އަކީ މީލާދުން 1558 ވަނަ އަހަރު ރާއްޖޭގައި ރަސްކަންކުރެއްވި އައްސުލްޠާނު ޢަލީ ހަވަނަ (އަލިރަސްގެފާނު) ޝަހީދުކޮށްލުމަށް ފަހު، ޕޯޗުގީޒުން ރާއްޖެ އަޅުވެތިކުރުމުން އެމީހުންގެ އަތުން ރާއްޖެ މިނިވަންކުރެއްވުމަށް ޓަކައި އުތީމު މަހާރަދުން ބެންނެވި އޮޑިކޮޅެވެ. 

މާލެ ގެނައުމަށް ހަމަޖެހިފައިވާ ކަޅުއޮށްފުންމީގެ ނަކަލު ބަދެވުނީ ދިވެހިރާއްޖޭގެ މިނިވަންކަމަށް 50 އަހަރު ފުރުމުގެ މުނާސަބަތާއި ގުޅިގެންނެވެ. މި އޮނޑިކޮޅު ބަދެފައިވަނީ އުތީމު މަހާރަދުންގެ ޤައުމީ ޖިހާދާއި ކަޅުއޮއްފުންމިއާ ބެހޭ ގޮތުން ލިބެން ހުރި ތާރީޚީ މަޢުލޫމާތު، ކަމާ ބެހޭ ފަންނީ ޓީމަކުން ދިރާސާކުރުމަށް ފަހު ލިބުނު ނަތީޖާތަކުގެ މައްޗަށެވެ. ކަޅުއޮށްފުންމީގެ ދިގުމިނުގައި 51 ފޫޓު ހުންނައިރު، އަލަށް ބަނދެވުނު ނަކަލު މޫދަށް ބާލާފައި ވަނީ 2 ޑިސެންބަރު 2015 ގައެވެ. މިނިވަން 50 ގެ ރަސްމިއްޔާތު ނިމުމުން އެ އޮޑި އޮތީ އާރަށަށް އެހެލާފައެވެ.