މުޒާހަރާތަކާއި ގުޅިގެން އިންޑިއާގެ މުމްބާއީ އެއާޕޯޓް ކައިރީގައި އޮންނަ އެއާ އިންޑިއާ ކޮލޮނީ ތަޅާލުން ހުއްޓާލައިފިއެވެ.

އަދާނީ އެއާޕޯޓްސް ކޮންޓްރޯލްކުރާ މުމްބާއީ އިންޓަނޭޝަނަލް އެއާޕޯޓް ލިމިޓެޑް (އެމްއައިއޭއެލް) އިން ކަލީނާގައި ހުންނަ އެއާ އިންޑިއާ ކޮލޮނީގެ 20 ރެސިޑެންޝަަލް އިމާރާތެއް ތަޅާލަން ފެށީ މި އަންގާރަ ދުވަހުގެ މެންދުރު ފަހު އެވެ. ނަަމަވެސް އޭގެ ގަޑިއެއްހާއިރު ފަހުން ތަޅާލުމާ ގުޅޭ އެއްވެސް ނޯޓިސްއެއް ނެރެފައި ނުވާ ކަމަށް ބުނެ އެތަނުގައި ދިރިއުޅޭ އާންމުން ވަނީ އަޑުގަދަ ކުރަން ފަށާފައެވެ.

އެމީހުން ތުހުމަތު ކުރާ ގޮތުގައި އެމްއައިއޭއެލް އިން މި މަސައްކަތް ކުރިއަށް ގެންދަނީ 2023 ވަނަ އަހަރު ސުޕްރީމް ކޯޓުން ނެރުނު އަމުރާ ހިލާފުވެ، މީހުންނަށް ބިރުދައްކައިގެންނެވެ.

މިއާއި ގުޅިގެން އެމްއައިއޭއެލް އިން ބުނީ އެކޮލޮނީ އަކީ ބަޔަކު އާބާދު ނުވާ "ދިރުމެއް ނެތް" ތަނެއް ކަމަށާއި އެ މަސައްކަތްތައް ކުރިއަށް ގެންގޮސްފައިވަނީ ކަމާބެހޭ ފަރާތްތަކުގެ ހުއްދަ އާއި އެކު ކަމަށެވެ. އަދި މި ތަންތަން ތަޅާލަނީ އެ ބިން ވިޔަފާރީގެ ގޮތުން ބޭނުން ކުރުމަށް ކަމަށް ވެސް އެމްއައިއޭއެލް އިން މައުލޫމާތު ދެއެވެ.

ވަޓްސްއެޕް ގްރޫޕްތަކުގެ ޒަރީއާއިން ކޮލޮނީގެ ރައްޔިތުންނަށް އެތަން ތަޅާލާކަން އެނގުމުން އެތަނަށް އެއްވެ، ކަމާބެހޭ ހުއްދަ ދެއްކުމަށް އެދުމުން އެމްއައިއޭއެލްގެ އޮފިޝަލުން އެކަމަށް ދެކޮޅު ހެދި ކަމަށް އެމީހުން ބުންޏެވެ. ގަވާއިދާ ހިލާފަށް ތަން ތަޅާލުމާ ގުޅިގެން ސުޕްރީމް ކޯޓާއި ސިވިލް ކޯޓަށް މައްސަލަ ހުށަހަޅަން ނިންމާފައިވާކަމަށް އޭވިއޭޝަން އިންޑަސްޓްރީ އެމްޕްލޯއީސް ގައިލްޑްގެ ކުރީގެ ކޯޕަރޭޓަރު އަދި ޖެނެރަލް ސެކްރެޓަރީ ޖޯޖް އަބްރަހަމް ވިދާޅުވި އެވެ.

ދެ ސްކޫލާއި އެއް ކޯޕަރޭޓިވް ސްޓޯރާއި ގާތްގަނޑަކަށް 1800 ސްޓާފް ކުއާޓަރު ހިމެނޭ މި ކޮލޮނީ ބިނާކޮށްފައިވަނީ 1950 ގެ އަހަރުތަކުގަ އެވެ. މިއީ އިންޑިއާގެ ސަރުކާރުން އެއާ އިންޑިއާއަށް ކުއްޔަށް ދީފައިވާ 184 އަކަފޫޓުގެ ބިމެކެވެ.  އެއާ އިންޑިއާ އާއި އެ ކުންފުނީގެ ދަށުން ހިންގާ ކުންފުނިތަކުގެ މުވައްޒަފުންގެ 350 އާއިލާ ހިމެނޭ ކޮލޮނީ ތަޅާލުމުގެ ޕްލޭންތައް މީގެ އެތައް އަހަރެއް ކުރިން ފެށިފައިވާކަމަށް އިންޑިއާގެ ނޫސްތަކުން ރިޕޯޓް ކުރެއެވެ.

ނިމިދިޔަ 2022 ވަނަ އަހަރާއި 2023 ވަނަ އަހަރު އެއާ އިންޑިއާ އިން ވަނީ އެ ކޮލޮނީގެ ރައްޔިތުންނަށް އެތައް ނޯޓިސްތަކެއް ދީ، އެތަން ހުސް ކުރުމަށް އެދިފަ އެވެ. ނަމަވެސް އެ ފަރާތްތަކުން އަނެއްކާވެސް އެސްސީއަށް ހުށަހެޅީ 2023 ވަނަ އަހަރުގެ ފަހުކޮޅަށް ތަޅާލުމުގެ މަސައްކަތް މަޑުޖައްސާލުމަށެވެ.