މަތީ ތައުލީމު ހާސިލު ކުރާ ލޯފަން ކުދިންނަށް އެހީވުމަށް ޓަކައި، ލައިބްރަރީތަކުގައި ހުރި ފޮތްތަކުގެ އޯޑިއޯ ރެކޯޑިން ހެދުމުގެ މަޝްރޫއެއް ފަށަން އުޅޭ ކަމަށް އިސްލާމީ ކަންކަމާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ރައްޔިތުންގެ ސުވާލުތަކަށް ވަޒީރުން ޖަވާބު ދިނުމަށް ބާއްވާ 'އަހާ'ގެ ފުރަތަމަ ފޯރަމްގައި، ވާހަކަދައްކަވަމުން ޝަހީމް ވިދާޅުވީ، ރައީސުލްޖުމުހޫރިއްޔާ ޑރ. މުހައްމަދު މުޢިއްޒު އެންމެ އިސްކަންދެއްވާ އެއް ދާއިރާއަކީ ޚާއްސަ އެހީއަށް ބޭނުންވާ ފަރާތްތަކުގެ ދާއިރާ ކަމަށެވެ.

އެގޮތުން ޚާއްސަ އެހީއަށް ބޭނުންވާ ފަރާތްތަކުގެ ތެރެއިން ލޯފަން މީހުންނަށް އެންމެ ގިނަ ވަޒީފާ ފުރުސަތު ފަހިކޮށްދީފައިވާ ވުޒާރާއަކީ އިސްލާމީ ކަންތައްތަކާ ބެހޭ ވުޒާރާއިން ކަންވެސް ވަޒީރު ފާހަގަކުރެއްވި އެވެ. 

މިއާއެކު ޝަހީމް ވިދާޅުވީ ލޯފަން ބޭފުޅުންގެ ތެރެއިން މަތީ ތައުލީމު ހާސިލު ކުރަން ބޭނުންވާ މީހުންނަށް ް ފުރުސަތު ފަހި ކޮށްދިނުމަށް މަސައްކަތް ކުރައްވަމުންދާ ކަމަށެވެ.

މީގެ އިތުރުން ނުކުޅެދުންތެރިކަން ހުންނަ މީހުންނަށް މިސްކިތް ތަކަށް ވަނުމަށް ކުރިމަތިވާ އުނދަގޫތައް ހައްލު ކުރުމަށް ކަމާއި ބެހޭ އިދާރާތަކާއެކު މަސައްކަތް ކުރައްވާނެ ކަމަށް ވެސް ޝަހީމް ވަނީ ވިދާޅުވެފަ އެވެ. 

އިސްލާމިކު މިނިސްޓްރީގެ ދަށުން މަސައްކަތް ކުރައްވަމުންދާ ބައެއް ލޯފަން އިމާމުންތަކެއް ދާދިފަހުން ޑިގްރީއަށް ހާސިލްކުރައްވާފައިވާއިރު، އެ ފަރާތްތަކުންވެސް އެންމެ ބޮޑު ކަންބޮޑުވުމެއް ފާޅުކުރެއްވީ، ފޮތް ތަކުގެ އޯޑިއޯ ނުލިބުން ކަމަށެވެ.