ކުރިއަށް އޮތް ރައްޔިތުން މަޖިލިހުގެ އިންތިހާބުގައި ޕީޕީއެމް/ ޕީއެންސީ ކޯލިޝަނުން މަޖިލިހުގެ ސްޕަރ މެޖޯރިޓީ، މަދުވެގެން 62 ނަގާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ މިއަދު ކުރިއަށްދާ ޕީޕީއެމް/ޕީއެންސީ މަޖިލިސް ޕްރައިމަރީގެ އިންތިހާބުގެ ވޯޓްލުން ކުރިއަށްދާގޮތް ބައްލަވާ ލެއްވުމަށް ހެންވޭރު ދަނޑަށް ވަޑައިގެން މީޑިޔާތަކާއި އާއި ބައްދަލު ކުރައްވާ ވާހަކަފުޅު ދައްކަވަމުންނެވެ.

"އިރާދަކުރެއްވިއްޔާ އަޅުގަނޑުމެން ސްޕަރ މެޖޯރިޓީ ކާމިޔާބުކުރާނަށް އެންމެ މަދުވެގެން 62 ގޮޑި ކާމިޔާބުކުރާނަން، އެއީ ރައްޔިތުންގެ ތާއީދާއިއެކު ، އަޅުގަނޑުމެން އުންމީދު ކުރަނީ އެހާ ހިސާބަށް އަޅުގަނޑުމެންނަށް މަސައްކަތް ކުރެވޭނެކަމަށް " ރައީސް ވިދާޅުވިއެވެ.  

Advertisement

މީގެ އިތުރުން ރައީސް ޑރ.މުއިއްޒު ވަނީ ވޯޓް ލުން ކުރިއަށްދަނީ ވަރަށް އޮމާން ކަމާއި ހަމަޖެހުމާއި އެކު ކަމަށާއި ދެތިން ދިމާލަކުން ކުޑަކޮށް ހަމަނުޖެހުންތަކެއް ފެނިވަޑައިގެން ނަމަވެސް އެކަންކަން ހައްލު ކުރެވިފައިވާ ކަމަށް ވިދާޅުވެފައެވެ. އަދި ޕްރައިމަރީ ތަކުގައި ވާދަކޮށްގެން މޮޅުވާނީ އެކަކު ކަމަށާއި ބަލިވާ އެންމެން އެކަތިގަނޑަކަށް ވާން ޖެހޭނެ ކަމަށް ވެސް އެމަނިކުފާނު ވިދާޅުވިއެވެ. 

މީގެ އިތުރުންވެސް ރައީސް ޑރ.މުއިއްޒު ވިދާޅުވީ އިންތިހާބުތަކާއި ގުޅިގެން ކުރިން ފެނިފައިވައިވާ ހަމަނުޖެހުންތައް ނުފެނި، އެންމެން ވެސް ގައުމު އިސްކުރަންޖެހޭ ކަމަށް ގަބޫލުފުޅު ކުރައްވާކަމަށެވެ.