ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެ ކެބިނެޓުގެ ބައެއް ވަޒީރުންނަށް ރުހުން ނުދިނުމަށް އިދިކޮޅު ދަ ޑިމޮކްރެޓްސް އިން ނިންމުމާއި ގުޅިގެން މަޖިލީސް ކައިރީގައި އާންމުން އިހުތިޖާޖް ކުރަން ފަށައިފިއެވެ.

އިދިކޮޅުގެ ޑިމޮކްރެޓްސް އިން މިފަދައިން ނިންމިކަން މިއަދު އިއުލާން ކޮށްފައިވާއިރު، މަޖިލީހުގެ އެމްޑީޕީ މެންބަރުން ވެސް ވަނީ އެ މޭރުމުން މިއަދު މަޖިލީހުގެ ތަޅުމުގައި ވާހަކަ ދައްކަވާފައެވެ.

އެކަމާއި ގުޅިގެން އާންމުން ވަނީ މަޖިލީސް ބޭރަށް އެއްވެ އެފަރާތްތަކުގެ ޝުއޫރުފާޅުކޮށް އިހުތިޖާޖް ކުރަން ފަށާފައެވެ. މި އިހްތިޖާޖްގެ ބައެއް ފަރާތްތަކުން ހިފަހައްޓައިގެން ތިބި ކަރުދާސްތަކުގައި ''ސަރުކާރު ނުހުއްޓުވޭނެ''، ''ތަރައްގީއަށް ހުރަސްނާޅާ''، ''މެންބަރުންގެ ޒިންމާ އަދާކުރޭ'' މިފަދަ އިބާރާތްތައް ވަނީ ލިޔެފައެވެ.

އަދި އެބޭފުޅުން އަންނަނީ، އެމްޑީޕީ އަދި ޑިމޮކްރެޓްސް މެންބަރުން ތިއްބެވީ "އިންޑިޔާގެ ދަށު" ވެފައި ކަމަށާ، އަދި މަޖިލީހުގެ އެމްޑީޕީ މެންބަރުންނާއި މަޖިލީހުގެ ރައީސް ވެސް އިސްތިއުފާ ދިނުމަށް ގޮވާލާފައެވެ. 

ސަރުކާރާއި އިދިކޮޅު ދެޕާޓީން ރުހުން ނުދިނުމަށް ނިންމާފައިވާ ވަޒީރުންނަކީ ބަންޑާރަ ނައިބު އަހްމަދު އުޝާމާއި، އިސްލާމިކް މިނިސްޓަރު ޑރ.ޝަހީމް އަލީ ސައީދު، އިކޮނޮމިކް މިނިސްޓަރު މުހައްމަދު ސައީދު، ހައުސިން މިނިސްޓަރު ޑރ.އަލީ ހައިދަރު ކަމަށް މައުލޫމާތު ލިބެއެވެ.

މަޖިލިސް ތެރޭގައި އެމްޑީޕީ އާއި އެކު މަސައްކަތްކުރާ ދަ ޑިމޮކްރެޓްސްއިން ބުނެފައިވާ ގޮތުން ވަޒީރުންނަށް ރުހުން ނުދިނުމަށް ނިންމީ އެޕާޓީގެ ޕީޖީން ބޭއްވި މަޝްވަރާ ބައްދަލުވުމެއްގައި ބައިވެރިވި މެންބަރުންގެ އިއްތިފާގުންނެވެ.

ވަޒީރުންނަށް ރުހުން ނުދިނުމަށް ނިންމާފައިވާ، އެމްޑީޕީގެ ޕީޖީ ގްރޫޕްގައި 44 މެންބަރުން އަދި ޑިމޮކްރެޓްސްގެ ޕީޖީ ގްރޫޕްގައި 13 މެންބަރުން ތިބެއެވެ.

މިއަދު ކުރިއަށްދާ 19 ވަނަ ރައްޔިތުންގެ މަޖިލީހުގެ ދައުރުން ބޭރުގައި ބާއްވާ ހާއްސަ ޖަލްސާ ގައި ވަޒީރުންނަށް ރުހުން ދިނުން އެޖެންޑާ ކޮށްފައިވީ ނަމަވެސް މި ކަމާއި ގުޅިގެން މަޖިލީހުގެ ތަޅުން ވަރަށް ބޮޑަށް ހޫނުވެ މަޖިލިސް ވަނީ މެދުކަނޑާލާފައެވެ.