ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ޢަދާލަތު ޕާޓީން ވާދަކުރާ ހަތަރު ދާއިރާގެ ޓިކެޓް ލިބިލައްވާ ބޭފުޅުންގެ ނަންތައް އިއުލާންކޮށްފިއެވެ.

 20 ވަނަ ރައްޔިތުންގެ މަޖިލީހުގެ އިންތިޚާބު މާރިޗު 17 ވަނަ ދުވަހު ބާއްވަން ހަމަޖެހިފައިވާއިރު، އެ އިންތިޚާބުގައި ޢަދާލަތު ޕާޓީން ވާދަކުރަނީ 4 ދާއިރާ އަކަށެވެ. 

އެ ދާއީރާ ތަކަށް ވާދަކުރާ ކެންޑިޑޭޓުން ކަނޑައެޅުމާއި ގުޅޭގޮތުން އެ ޕާޓީއިން ނެރުން ބަޔާނެއްގައި ބުނެފައިވަނީ ރައްޔިތުންގެ މަޖިލީހުގެ އިންތިޚާބުގައި ޢަދާލަތު ޕާޓިގެ ޓިކެޓުގައި ވާދަކުރުމަށް ހުޅުވައިލި ފުރުސަތުގައި ކުރިމަތިލެއްވި ފަރާތްތަކުގެ ތެރެއިން ޕާޓީގެ ޓިކެޓު ދޭނެ ބޭފުޅުން ޢަދާލަތު ޕާޓީގެ 3 ވަނަ ދައުރުގެ މަޝްވަރާ މަޖިލީހުގެ 33 ވަނަ ބައްދަލުވުމުން ފާސްކޮށްފައިވާކަމަށެވެ.

އެގޮތުން ޓިކެޓު ލިބުނު ފަރާތްތައް:

ހުސެއިން ޝަފީޤް – ވައިކަރަދޫ ދާއިރާ

އިމްރާން އަބްދުالله – މަކުނުދޫ ދާއިރާ

އިސްމާއީލް ހަމީދު – ފުނަދޫ ދާއިރާ

އިސްމާއީލް އަލީ – އިނގުރައިދޫ ދާއިރާ

މިހާރު ހިނގަމުންދާ 19 ވަނަ މަޖިލީހުގެ އިންތިޚާބުގައިވެސް އަދާލަތުން ނުވަ ދާއިރާއަކަށް ވާދަކުރިއެވެ.

އެ ދާއިރާތަކަކީ މަކުނުދޫ ދާއިރާއާއި ވައިކަރަދޫ ދާއިރާއާއި ކެލާ ދާއިރާއާއި ގައްދޫ ދާއިރާއާއި އިނގުރައިދޫ ދާއިރާއާއި މަހިބަދޫ ދާއިރާއާއި ކާށިދޫ ދާއިރާއާއި ނިލަންދޫ ދާއިރާ އަދި މުލަކު ދާއިރާއެވެ.

ނަމަވެސް އެތަނުން އެއްވެސް ދާއިރާއެއްގެ ގޮނޑި އެ ޕާޓީއަށް ލިބިފައެއް ނުވެއެވެ. އޭގެ ކުރިން އޮތް 18 ވަނަ މަޖިލީހުގައި އަދާލަަތަށް 1 ގޮނޑި ލިބިފައިވާއިރު، އެއީ އަނާރާ ނަޢީމް ވާދަކުރެއްވި މަކުނުދޫ ދާއިރާގެ ގޮނޑިކަން ފާހަގަކޮށްލަންޖެހެއެވެ.

މިއަހަރު ބާއްވާ މަޖިލިސް އިންތިޚާބު އޮންނާނީ މާރިޗު މަހުގެ 17 ވަނަ ދުވަހު ކަމަށް އީސީން ވަނީ އިއުލާންކޮށްފަ އެވެ. މިއީ ރޯދަ މަހުގެ 7 ވަނަ ދުވަހެވެ.