ވަޒީރުންނަށް ރުހުން ނުދިނަސް "މުއިއްޒު ދުވެލި" ގައި ސަރުކާރު ހިނގަމުންދާނެ ކަމަށް ރައީސް މުއިއްޒުގެ ހާއްސަ އެޑަވައިޒަރު އަބްދުއްރަހީމް އަބްދުالله މިއަދު ވިދާޅުވެއްޖެއެވެ.
އަބްދުއްރަހީމް ދެއްވި ބަސްދީގަތުމެއްގައި ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ގެ ސަރުކާރު ގެ ކެބިނެޓްގައި ހިމެނިވަޑައިގަންނަވާ އެންމެ ވަޒީރަކަށް ރުހުން ނުދިނަސް މިއަދުން މިއަދަށް އެބޭފުޅަކު ހުރި މަގާމަށް އައްޔަނު ކުރުމުގެ ބާރު ރައީސް ޑރ.މުއިއްޒަށް ލިބިގެން ވާކަމަށެވެ.
ވަޒީރުންނަށް ރުހުން ނުދީގެން ސަރުކާރު ހުއްޓުވާނުލެވޭނެ ކަމަށާއި މިކަމާއި ގުޅޭ ރޫލިން އެއް ސުޕްރީމް ކޯޓުގައި އޮންނާނެ ކަމަށް ވެސް އަބްދުއްރަހީމް ވިދާޅުވިއެވެ.
"ފަހަރެއްގައި މި ބޭފުޅުންނަށް ހީފުޅުކުރެއްވިދާނެ ރުހުން ނުދިނީމަ ސަރުކާރު ހުއްޓުމަކަށް ގެނެވޭނޭ. އެކަމެއް ނުކުރެވޭނެ. ސަރުކާރު ހަމަ ބާރު ސްޕީޑްގައި ކުރިއަށްދާނެ. މުއިއްޒު ދުވެލީގައި ސަރުކާރު ހިނގަމުންދާނެ އިނގޭތޯ. "
އަބްދުއްރަހީމް ވިދާޅުވިއެވެ.
މީގެއިތުރުންވެސް އަބްދުއްރަހީމް ވިދާޅުވީ ފުރަތަމަ ފެހި ގާނޫނު އަސާސީގެ ދަށުން އެމްޑީޕީ ވެރިކަމަށް އައިރު އޭރު އިދިކޮޅުގައި ތިއްބަވައިގެން ކެބިނެޓަށް ރުހުން ދެއްވި ކަމަށެވެ. އަދި އޭގެ ފަހުން އައި ކޮންމެ ސަރުކާރަކަށް ވެސް އޭރުގައި އޮތް އިދިކޮޅުން ރުހުން ދިން ނަމަވެސް އިދިކޮޅު އެމްޑީޕީން އުޅެނީ ޑރ.މުއިއްޒުގެ ކެބިނެޓަށް ރުހުން ދޭން ނުކެރިގެން ކަމަށް ވިދާޅުވެ އަބްދުއްރަހީމް ވަނީ ވަޒީރުންނަށް ރުހުން ނުދިނުމަކީ ޑިމޮކްރަސީ އާއި ވަރަށް ބީރައްޓެހި ކަމެއްގެ ގޮތުގައި ސިފަކުރައްވާފައެވެ.
ރައީސް ޑރ.މުއިއްޒުގެ ސަރުކާރަށް ދެމަސް ވެގެން ދިޔައިރުވެސް މި ސަރުކާރުގެ ކެބިނެޓުގައި ހިމެނޭ ވަޒީރުނަށް މަޖިލީހުން ރުހުން ދީފައެއް ނުވެއެވެ.
މިއަދު ކުރިއަށްދާ 19 ވަނަ ރައްޔިތުންގެ މަޖިލީހުގެ ހާއްސަ ޖަލްސާގައި ވަޒީރުނަށް ރުހުން ދިނުން އެޖެންޑާކޮށް މިކަމާއި ގުޅޭގޮތުން ބަހުސްކުރުން ކުރިއަށް ދިޔައިރު މަޖިލީހުގެ ތަޅުން ހަލަބޮލި ވެގެން ދިޔައެވެ. އަދި ތަޅުން ހޫނުވެ، މަޖިލީހުގައި ތިބި ސަރުކާރަށް ތާއީދު ކުރާ މެމްބަރުން ވަނީ މަޖިލިސް ތެރޭގައި އިހުތިޖާޖް ކޮށް، މަޖިލީހަށް ވަދެވެން ހުރި ހުރިހާ ދޮރެއް އެތެރެއިން ތަޅުލައި، މަޖިލިސް ފެށުމަށް ހުރަސްތައް ކުރިމަތި ކުރުވާފައެވެ.
ވަޒީރުންނަށް ރުހުން ނުދޭން ނިންމައި، ދަ ޑިމޮކްރެޓްސް އިން ނެރުނު ބަޔާނެއްގައި ބުނީ މި ނިންމުން ނިންމާފައިވަނީ އެ ޕާޓީގެ ޕީޖީން ބޭއްވި މަޝްވަރާ ބައްދަލުވުމެއްގައި ބައިވެރިވި މެންބަރުންގެ އިއްތިފާގުން ކަމަށެވެ. އިދިކޮޅުން ރުހުން ނުދޭން ނިންމި ވަޒީރުންގެ ތެރޭގައި ހިމެނެނީ އެޓާނީ ޖެނެރަލް އަހްމަދު އުޝާމްއާއި ފޮރިން މިނިސްޓަރ މޫސާ ޒަމީރުއާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ.ހައިދަރުއެވެ.
މި މައްސަލަ އާއި ގުޅިގެން އާންމުން ވެސް މަޖިލީހުގެ ބޭރަށް އެއްވެ އިހުތިޖާޖް ކުރަމުންދާކަން ފާހަގަ ކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
