ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓް ގައި ހިމެނިވަޑައިގަންނަވާ ވަޒީރުންގެ ތެރެއިން، މަޖިލީހުން ރުހުން ނުދިން ތިން ވަޒީރުން އަލުން މަގާމަށް އައްޔަނު ކުރައްވައި، މަމަގާމުގެ ފަތްކޮޅު، ރައީސް ޑރ. މުހައްމަދު މުއިއްޒު އަރުވައިފި އެވެ. 

ރައީސް މުޢިއްޒުގެ ކެބިނެޓަށް ރުހުން ދިނުމުގެ މައްސަލަ ލަސް ކުރުމަށްފަހު ދައުރުން ބޭރުގައި ޖަލްސާ ބާއްވައިގެން މިއަދު އެ މައްސަލަ ކުރިއަށް ގެންގޮސްފައިވާއިރު، އިދިކޮޅު މައި ޕާޓީ އަދި މަޖިލީހުގެ މެޖޯރިޓީ ޕާޓީ، އެމްޑީޕީ އާއި ޑިމޮކްރެޓްސް އިން ވަނީ ޑރ. ޝަހީމް، އުޝާމް، ޑރ. ހައިދަރު އަދި އިކޮނަމިކް މިނިސްޓަރު މުހައްމަދު ސައީދަށް ވެސް ރުހުން ނުދިނުމަށް ވިޕްލައިން ނެރެފައެވެ. 

އަދި، މިއަދުގެ ޖަލްސާގައި ވޯޓަށް އެހުމުން، ބަންޑާރަ ނާއިބު އުޝާމް އަށް ރުހުން ދޭން 24 މެންބަރުން ވޯޓުލާފައިވާއިރު، އޭނާއަށް ރުހުންދޭން ނުފެންނަ ކަމަށް 44 މެންބަރުން ވޯޓުލާފައިވެއެވެ.

އުޝާމް އަށްފަހު މިނިސްޓަރު ޝަހީމް އަށް ރުހުން ދިނުމަށް ވޯޓަށް ހުޅުވާލުމުން ވޯޓުގައި ބައިވެރިވި 31 މެންބަރުން ރުހުން ނުދޭން ވޯޓުލާފައި ވެއެވެ. އަދި ރުހުން ދޭން 30 މެންބަރުން ވޯޓުލާފައި ވާއިރު ވަކި ގޮތަކަށް ވޯޓު ނުދޭ 8 މެންބަރުން ތިއްބެވެ. އެހެންކަމުން އެއް ވޯޓާއި އެކު ޝަހީމަށް ރުހުން ދޭން ނުފެންނަކަމަށް ވަނީ ފާސްވެފަ އެވެ. ރުހުން ދޭން ފެންކަމަށް ފާސް ވާން ބޭނުން ވަނީ 31 ވޯޓެވެ.

މީގެ އިތުރުން ޑރ. ހައިދަރަށް ރުހުން ނުދޭން 46 މެންބަރުން ވޯޓު ދީފައި ވާއިރު އޭނާ އަށް ރުހުން ދިނީ 24 މެންބަރުންނެވެ. 

އެހެންކަމުން އެ ތިން ބޭފުޅުންނަށްވެސް ރުހުން ނުދޭން މަޖިލީހުން ފާސްވެފައިވާ ކަމަށް އަސްލަމް ވަނީ އިއުލާން ކުރައްވާފައެވެ. 

އެ ތިން ވަޒީރުން ވެސް އަލުން މަގާމަށް އައްޔަނު ކުރައްވައި ހުވާ ކުރައްވާފައިވާއިރު، ގާނޫނުއަސާސީގެ 129 ވަނަ މާއްދާގައިވާ ގޮތުން ކެބިނެޓަށް އައްޔަން ކުރުމަށް ފަހު ހަތް ދުވަހުގެ ތެރޭގައި ރުހުން ހޯދަން މަޖިލީހަށް ފޮނުވަން ޖެހެ އެވެ.

ވަޒީރަކަށް ރުހުން ނުދީފި ނަމަ ވާނެ ގޮތެއް ގާނޫނުގައި ނުބުނެ އެވެ. އެކަމަކު އެ މައްސަލާގައި މީގެ ކުރިން ސުޕްރީމް ކޯޓުން ނެރެފައިވާ އަމުރެއްގައި ބުނެފައި ވަނީ ރުހުން ދޭން ނުފެންނަ ކަމަށް ނިންމިޔަސް އެ ވަޒީރަކު މަގާމުން ވަކިވާނީ ރައީސުލްޖުމްހޫރިއްޔާ އޭނާ މަގާމުން ވަކި ކުރުމުން ނުވަތަ އޭނާ އަމިއްލަ އަށް އެ މަގާމުން ދުރުވުމުން ކަމަށެވެ. އެ ނޫން ހާލަތްތަކުގައި ޑިފެކްޓޯކޮށް އޭނާ ވަޒީފާގައި ދެމިހުރެވޭނެ ކަމަށް އެ އަމުރުގައި ބުނެފައިވެ އެވެ.