ކުރިއަށް އޮތް 20 ވަނަ ރައްޔިތުން މަޖިލިހުގެ އިންތިހާބު ރޯދައިގެ ފަހުން ބާއްވާ ގޮތަށް ނިންމައިފި ނަމަ އިންތިހާބު ބޭއްވުމަށް މިހާރު ހަމަޖެހިފައިވާ ބަޖެޓަށް ވުރެ އިތުރަށް ބަޖެޓް ބޭނުންވާނެކަމަށް އިލެކްޝަންސް ކޮމިޝަނުގެ ނާއިބުރައީސް އިސްމާއިލް ހަބީބް ވިދާޅުވެއްޖެއެވެ.

ހަބީބު ވިދާޅުވީ އިންތިހާބުތަކާއި ބެހޭ ޢާންމު ގާނޫނަށް ގެނެވޭ ބަދަލަކުން، އިންތިހާބުގެ ތާރީޚަށް ބަދަލެއް ގެނައުމަށް ލާޒިމް ވެއްޖެ ހިނދެއްގައި، އެގޮތަށް އީސީން ޢަމަލުކުރާނެ ކަމަށާއި ނަމަވެސް އެގޮތަށް މަޖިލިހުން ނިންމަވާ ނަމަ ރިއާޔަތްކުރައްވަން ޖެހޭ ގިނަ ކަންތައްތަކެއް އެބަހުރި ކަމަށެވެ.

އެގޮތުން ހަބީބު ވިދާޅުވީ އިންތިހާބު ލަސްކުރާ ނަމަ އިންތިހާބު ބޭއްވުމަށް ސްކޫލުތައް ލިބޭނެގޮތް ހޯދުމާއި، އިންތިހާބަށް ބޭނުންވާ އިތުރު ވަސީލަތްތައް ހޯދުމުގެ އިތުން އިންތިހާބާއި ގުޅޭ އޮފިޝަލުންނަށް ބޭނުންވާ އިތުރު ތަމްރީނުދިނުން ފަދަ ކަންތައްތަކަކީ މަޖިލިހުން ރިޢާޔަތް ކުރައްވަން ޖެހޭނެ ކަންތައްތަކެކެވެ.

ކުރިއަށް އޮތް 20 ވަނަ ރައްޔިތުންގެ މަޖިލިސް އިންތިހާބަށް ކަނޑައަޅާފައިވާ ބަޖެޓަކީ 60 މިލިޔަން ރުފިޔާއެވެ.

ހަބީބު މިފަދައިން ވިދާޅުވެފައި ވާއިރު މަޖިލިހުގެ މެޖޯރިޓީއޮތް އެމްޑީޕީގެ ފަރާތުން ވަނީ މަޖިލިސް އިންތިހާބު ފަސްކުރުމާއި މެދު ގޮތެއް ނިންމުމަށް މަޖިލިހަށް ހުށައަޅާފައެވެ. މި ހުށައެޅުމަށް ދަ ޑިމޮކޮރެޓްސް އާއި އަދި ޕީޕީއެމް/ޕީއެންސީ ކޯލިޝަނުންވެސް ތާއިދު ކުރާކަންވަނީ ހާމަކޮށްފައެވެ.

" ރައްޔިތުންގެ މަޖިލީހުގެ އިންތިޚާބު ބޭއްވުމަށް ކޮމިޝަނުން ކަނޑައަޅާފައިވަނީ 2024 މާރިޗް 17 ވާ އާދީއްތަ ދުވަހު. އެހެންނަމަވެސް، އިންތިހާބުތަކާ ބެހޭ ޢާންމު ގާނޫނަށް ގެނެވޭ ބަދަލަކުން، އިންތިހާބުގެ ތާރީޚަށް ބަދަލެއް ގެނައުމަށް ލާޒިމް ވެއްޖެ ހިނދެއްގައި، އެކަން އެގޮތަށް ވުމުގެ ފުރުސަތު އޮންނާނެ. އިލެކްޝަންސް ކޮމިޝަނުން ޢަމަލުކުރަނީ ގާނޫނުގައިވާ ގޮތުގެމަތިން." އެކަމަށް އިޝާރާތް ކުރައްވާ ހަބީބުގެ ޕޯސްޓުގައި ބުނެފައިވެއެވެ.

ކުރިއަށް އޮތް ރައްޔިތުން މަޖިލިހުގެ އިންތިހާބުގައި ވާދަކުރަން ބޭނުންވާ ފަރާތްތަކަށް އެކަމުގެ ފުރުޞަތު ވެސް މިއަދު ވަނީ އީސީން ހުޅުވާލައިފައެވެ.

"2024 ޖެނުއަރީ 30 ވަނަ ދުވަހުން ފެށިގެން، ފެބުރުއަރީ މަހުގެ 14 ވަނަ ދުވަހާ ހަމަޔަށް، އިންތިހާބަށް ކުރިމަތިލުމުގެ ފުރުސަތު ވަނީ ހުޅުވާލާފައި. އެޕްލިކޭޝަން ފޯމު ދޫކުރުމާއި ބަލައިގަތުން އޮންނާނީ ހެނދުނު 9:00 ން މެންދުރުފަހު 2:00 އަށް ދަރުބާރުގޭގެ ރަންނަބަނޑޭރި މާލަމުގައި. ހުކުރު ދުވަހު މެންދުރުފަހު 2:00 ން ހަވީރު 4:00 އަށް." ހަބީބުގެ ވިދާޅުވެފައި ވެއެވެ.