މިލިއަނަކަށްވުރެ ގިނަ ރުފިޔާގެ ތަކެތި ވަގަށްނެގި 2 މީހަކު ފުލުހުން ހައްޔަރު ކޮށްފިއެވެ.

ދިވެހި ފުލުހުން ގެ ހިދުމަތުން ނެރުނު ނޫސް ބަޔާނެެއްގައި ބުނީ މިލިއަނަކަށް ވުރެ ގިނަ ރުފިޔާގެ ތަކެތި ވަގަށް ނަގާފައިވަނީ ހ. ތިމާވެށި، ފަސްވަނަ ފަންގިފިލާއިން ކަމަށާއި މި މައްސަލަ މި ޖަނަވަރީ މަހުގެ 25 ވަނަ ދުވަހު ފުލުހުންނަށް ރިޕޯޓު ކޮށްފައިވާކަމަށެވެ.

މައްސަލައާއި ގުޅިގެން ފުލުހުން  ވަނީ  30 އަހަރާއި 38 އަހަރުގެ ދިވެހި 2 ފިރިހެނުން ހައްޔަރުކޮށްފައެވެ. ހައްޔަރު ކުރެވުނު ދެ މީހުންގެ ތެރެއިން  30 އަހަރުގެ މީހާ ހައްޔަރުކޮށްފައިވަނީ ޖަނަވަރީ 26 ވަނަ ދުވަހުއެވެ. 38 އަހަރުގެ މީހާ ހައްޔަރުކޮށްފައިވަނީ ޖަނަވަރީ 27 ވަނަ ދުވަހުއެވެ. މި ދެމީހުންނަކީ ވެސް ކުށުގެ ރެކޯޑު އޮންނަ ދެމީހުން ކަމަށް ފުލުހުން ބުނެއެވެ. މި ދެމީހުން ގެ ބަންދާއި މެދު  ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 އަހަރުގެ މީހާ 30 ދުވަހަށް އަދި 38 އަހަރުގެ މީހާ 15 ދުވަހަށް ބަންދުކުރުމަށްވަނީ އަމުރުކޮށްފައެވެ.

މައްސަލައިގައި ޝާމިލްވާ ދެމީހުން ހައްޔަރު ކުރުމުގެ އިތުރަށް ފުލުހުން ވަނީ އެގެއިން ވަގަށް ނަގާފައިވާ ބައެއް ތަކެތިވެސް ހޯދާފައެވެ. މިގޮތުން ދެ މީހުން ހައްޔަރުކޮށް، އެމީހުން  އުޅޭ ތަން ބަލާ ފާސްކުރި އިރު، ފެނުނު ވަގަށް ނަގާފައިވާ ތަކެތީގެ ތެރޭގައި،  އިލެކްޓްރޯނިކްސް ސާމާނާއި އަތުކުރީ ގަޑި ހިމެނެއެވެ. މި ތަކެތީގެ އަގު މިލިއަނަކަށްވުރެ ބޮޑު ކަމަށް ފުލުހުން މައުލޫމާތު ދެއެވެ.

މި މައްސަލަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުންދާކަމަށް ފުލުހުން މައުލޫމާތު ދެއެވެ.