ދިވެހިރާއްޖޭގެ ޚާއްޞަ އިޤްތިޞާދީ ސަރަހައްދުގައި ވަނިކޮށް ދިވެހި މަަސްދޯންޏަަކަށް އިންޑިޔާގެ ޢަސްކަރިއްޔާގެ ސިފައިން އަރައިފިއެވެ. 

މިކަމާއި ގުޅޭގޮތުން މަޢުލޫމާތު ދެއްވަމުން އެމްއެންޑީއެފްގެ މީޑިއާ އޮފިޝަލް ވިދާޅުވީ, ރާއްޖޭގެ މަސްދޯންޏަށް އަރާފައި ވަނީ ބޭރުގެ އަސްކަރިއްޔާއަކަށް ނިސްބަތްވާ އުޅަނދެއްގެ ބޯޑިން ޓީމަކުން ކަމަށެވެ. 

އަދި އެ މައްސަލައިގެ ރިޕޯޓް އެ އިދާރާއަށް ވެސް ލިބިފައިވާތީ އެކަން އެމްއެންޑީއެފްއިން ބަލަމުންގެންދާކަމަށާ، ރާއްޖޭގެ ދޯނި އޮތް ސަރަހައްދަށް އެމްއެންޑީއެފް ކޯސްޓްގާޑުގެ އުޅަނދެއް މިހާރު ދަތުރު ކުރަމުންދާ ކަމަށް ވެސް އެމްއެންޑީއެފްއިން ބުނެފައިވެއެވެ. 

Advertisement

އިންޑިޔާ ސިފައިން އަރާފައިވަނީ އދ. މަހިބަދޫއަށް ނިސްބަތްވާ ބޮޑު ކަންނެލީގެ މަސްވެރިކަން ކުރަމުން އަންނަ 'އަސުރުމާ 3" ދޯންޏަށް ކަން "ވޮއިސް" އަށް ވަނީ ކަށަވަރުވެފައެވެ. 

އަދި އަސުރުމާ ދޯނީގައި ގާތްގަނޑަކަށް ވިއްސަކަށް ދިވެހިން ތިބި ކަމަށް މަޢުލޫމާތު ލިބިފައިވާއިރު، އިންޑިޔާ ސިފައިން މިހާރުވެސް އެ ދޯނީގައި ތިބި ކަމަށް ވެސް މަޢުލޫމާތު ލިބެއެވެ. 

މީގެ އިތުރުން އެ ދޯންޏަށް އަރާފައިވަނީ ގާތްގަނޑަކަށް 7އިންޑިޔާ ސިފައިން ކަމަށާ، އެ ސިފައިން ދޯންޏަށް އެރީ އެ ސަރަހައްދު ކަނޑަށް ފެތުނު އެއްޗެއް ހޯދަމުން ކަމަށް އެމީހުން ބުނި ކަމަށް ދޯނީގެ ކެޔޮޅާއި ހަވާލާދީ ވޮއިސްއަށް މައުލޫމާތު ދިން މީހަކު ބުންޏެވެ. 

ނަމަވެސް ފަހުން، އެ ދޯނީގައި ތުރާޔާ ސެޓްލައިޓް ފޯން ގެންގުޅޭ ތޯ ސުވާލުކޮށް، އެއީ އެ ސަރަހައްދުގައި މަނާ ކަމެއް ކަމަށް ބުނެވެސް ފަޅުވެރިންނާ ސުވާލުކުރި ކަމަަށް ބުންޏެވެ. 

"އެމީހުން ފުރަތަަމަ ބުނި ކަމަށް ވަނީ އެތަނަށް ފެތުނު އެއްޗެއް ހޯދާށޭ އުޅުނީ. ދެން ފަހުން ތުރާޔާ ސެޓްލައިޓް ފޯނު އޮތްތޯ ސުވާލުކުރިޔޯ. އަދި އެއީ އެ ސަރަހައްދުގައި ބޭނުން ކުރުން މަނާ އެއްޗެއް ކަމަށްވެސް ބުނި ކަމަށް. އެކަމަކު ތުރާޔާ ފޯނު ރާއްޖޭގަ ބޭނުންކުރުމަކީ މަނާކަމެއް ވެސް ނޫން. އެ ދޯނީގަ ނޯންނާނެ އޭގެ ފޯނެއް ވެސް. އެ ދޯނީގަ އިންނާނީ އުރީދޫއިން ހަރުކޮށްފައިން ޑިވައިސްއެއް،" ދޯނީގެ ކެޔޮޅާއި ހަވާލާދީ ވޮއިސް އަށް މައުލޫމާތު ދިން މީހަކު ބުންޏެވެ.