ރާއްޖޭގައި މިވަގުތު އެންމެ ބޮޑު މައްސަލައެއްގެ ގޮތުގައި ދިމާވެފައިވާ ސްކޭމް ކުރުމުގެ ކަންތައްތައް ހައްލުކުރުމަށްޓަކައި ފުލުހުންގެ ތެރޭގައި ސްކޭމް ސެންޓަރެއް ޤާއިމު ކުރުމުގެ މަސައްކަތް ކުރައްވަމުން ގެންދަވާކަމަށް ދިވެހި ފުލުހުންގެ ޢިދާރާއިން ވިދާޅުވެއްޖެއެވެ.

ފުލުހުންގެ ޢިދާރާއިން މިފަދައިން ވިދާޅުވެފައި ވަނީ އިކޮނޮމިކް ކްރައިމް ޑިޕާޓްމެންޓުން ތަހުގީގު ކުރަމުންދ ގެންދާ މައްސަލަތަކާއި ގުޅޭގޮތުން ނޫސްވެރިންނަށް މަޢުލޫމާތު ދިނުމަށްޓަކައި މިއަދު ބޭއްވުނު ނޫސްވެރިންގެ ބައްދަލުވުމުގައި ސްކޭމްކަންތައްތައް ތަހްޤީގު ކުރުމުގައި އެންމެ އިސްކޮށް ހަރަކާތްތެރި ވެލައްވަމުން ގެންދަވާ ފަރާތްތަކުންނެވެ.

"އަޅުގަނޑުމެން އިރާދަކުރެއްވިއްޔާ މިއަހަރުގެ ފުރަތަމަ ކުއާޓަރގައި ނުވަތަ މާރޗްގައި އަޅުގަނޑުމެން ސްކޭމް ސެންޓަރުގެ މަސައްކަތް ފެށިގެން ކުރިންއަށް ދާނެ" ފުލުހުން ވިދާޅުވިއެވެ. 

Advertisement

ފުލުހުން މިއަދު ވިދާޅުވީ މިހާތަނަށް ސްކޭމް ކުރުމުގެ ތަފާތު މައްސަލަތަކުގައި ރައްޔިތުންގެ އަތުން 57 މިލިޔަނަށް ވުރެ ގިނަ ރުފިޔާ ގެއްލިފައިވާ ކަމަށެވެ. އޭގެ ތެރެއިން 27 މިލިޔަން ރުފިޔާއަކީ މިދިޔަ އަހަރުގެ ފަހުކޮޅުން ފެށިގެން މިއަދާއި ހިސާބަށް ރައްޔިތުންގެ އަތުން ގެއްލިފައިވާ ފައިސާކަމަށް ވާއިރު މިހާތަނަށް ހޯދިފައިވަނީ ނުވަތަ ރިކަވަ ކުރެވިފައިވަނީ އެއް މިލިޔަން ރުފިޔާ ކަމަށެވެ.

ފުލުހުންގެ މި ނޫސްވެރިންގެ ބައްދަލުވުމުގައި އެބޭފުޅުން ވިދާޅުވިގޮތުގައި ސްކޭމްކުރުމުގެ ކަންތައްތަކަކީ ވަރަށް ފުޅާގޮތެއްގައި ކުރަމުންގެންދާ ކަމެއް ކަމަށާއި އާއްމު ރައްޔިތުން ހީވެސް ނުކުރާ ފަދަ ގޮތް ގޮތަށް ސްކޭމް ކުރުމުގެ ކަންތައްތައް މިހާރު ހިންގަމުން ގެންދާ ކަމަށެވެ.

އެގޮތުން މިހާރުވެސް 28000 (އަށާވީސް ހާސް) އަށް ވުރެ ގިނަ މައްސަލަތައް ފުލުހުންގެ ޢިދާރާއަށް ހުށަހެޅިފައިވާ ކަމަށް އެ ޢިދާރާއިން ވިދާޅުވިއެވެ. އެގޮތުން ފުލެޓް ލިބިގެން ކުރާ ފޯނުކޯލުގެ ޒަރިއްޔާއި ހިންގާ ސްކޭމްތަކާއި ،ފޯނަށް ފޮނުވާ ލިންކެއް މެދުވެރިކޮށް ޕާސަނަލް އިންފޮމޭޝަން ހޯދުމަށް ބުނެ ހިންގާ ސްކޭމްތަކާއި، ރީލޯޑް އަދި ރާސްޓަސް ބޭނުންކޮށްގެން ހިންގާ ސްކޭމް ކުށްތައް ފަދަ އެތަށް ވައްތަރެއްގެ ސްކޭމްތައް ހިމެނެއެވެ.