ދިވެހިރާއްޖޭގެ ޚާއްޞަ އިޤްތިޞާދީ ސަރަހައްދުގައި ވަނިކޮށް ދިވެހި މަަސްދޯންޏަަކަށް އިންޑިޔާގެ ޢަސްކަރިއްޔާގެ ސިފައިން އެރުމުން މަސްވެރިކަމާއި ކަނޑުގެ ވަސީލަތްތަކާއިބެހޭ ވުޒާރާގެ ވަޒީރު އަހުމަދު ޝިޔާމް ކަންބޮޑުވުން ފާޅުކުރައްވައިފިއެވެ.
މިއަދުގެ ވަގުތެއްގައި އދ. މަހިބަދޫ އަށް ނިސްބަތްވާ ބޮޑުކަންނެލީގެ މަސްވެރިކަން ކުރަމުން އަންނަ "އަސުރުމާ 3" މަސްދޯންޏަށް އަރާފައި ވަނީ ބޭރުގެ އަސްކަރިއްޔާއަކަށް ނިސްބަތްވާ އުޅަނދެއްގެ ބޯޑިން ޓީމަކުން ކަމަށް އެމްއެންޑީއެފްއިން ވަނީ މަޢުލޫމާތު ދީފައެވެ.
އަސުރުމާ 3 ދޯނީގައި އެވަގުތު ވިއްސަކަށް މީހުން ތިބި އިރު އެ ދޯންޏަށް އެރީ 7 އިންޑިޔާ ސިފައިން ކަމަށް ދޯނީގެ ކެޔޮޅާއި ހަވާލާދީ "ވޮއިސް" އަށް މައުލޫމާތު ދިން މީހަކު ވަނީ ބުނެފައެވެ.
އަދި އެ ސިފައިން ދޯންޏަށް އެރީ އެ ސަރަހައްދު ކަނޑަށް ފެތުނު އެއްޗެއް ހޯދަމުން ކަމަށް އެމީހުން ބުނި ކަމަށާ،ނަމަވެސް ފަހުން، އެ ދޯނީގައި ތުރާޔާ ސެޓްލައިޓް ފޯން ގެންގުޅޭތޯ ސުވާލުކޮށް، އެއީ އެ ސަރަހައްދުގައި މަނާ ކަމެއް ކަމަށް ބުނެވެސް ފަޅުވެރިންނާ ސުވާލުކުރި ކަމަަށް ބުންޏެވެ.
"އެމީހުން ފުރަތަަމަ ބުނި ކަމަށް ވަނީ އެތަނަށް ފެތުނު އެއްޗެއް ހޯދާށޭ އުޅުނީ. ދެން ފަހުން ތުރާޔާ ސެޓްލައިޓް ފޯނު އޮތްތޯ ސުވާލުކުރިޔޯ. އަދި އެއީ އެ ސަރަހައްދުގައި ބޭނުން ކުރުން މަނާ އެއްޗެއް ކަމަށްވެސް ބުނި ކަމަށް. އެކަމަކު ތުރާޔާ ފޯނު ރާއްޖޭގަ ބޭނުންކުރުމަކީ މަނާކަމެއް ވެސް ނޫން. އެ ދޯނީގަ ނޯންނާނެ އޭގެ ފޯނެއް ވެސް. އެ ދޯނީގަ އިންނާނީ އުރީދޫއިން ހަރުކޮށްފައިން ޑިވައިސްއެއް،" ދޯނީގެ ކެޔޮޅާއި ހަވާލާދީ ވޮއިސް އަށް މައުލޫމާތު ދިން މީހަކު ބުންޏެވެ.
އެކަމާއި ގުޅިގެން ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ، އަސުރުމާ-3 ދޯނި ހއ.ތުރާކުނުގެ އިރުމަތިން 72 މޭލު ބޭރުގައި ބޮޑުކަންނެލީގެ މަސްވެރިކަން ކުރުމުގައި ހަރަކާތްތެރިވަމުން ދަނިކޮށް ބޭރު ޤައުމެއްގެ އަސްކަރީ އުޅަނދަކުން އެ ދޯންޏަށް އަރައި ފަޅުވެރިންނާ ސުވާލުކޮށްފައިވާކަމީ ނުހަނު ކަންބޮޑުވާ ކަމެއް ކަަމަށެވެ.
ޝިޔާމް ވިދާޅުވީ އެ އުޅަނދު ހަރަކާތްތެރި ވަމުން ދިޔައީ ދިވެހިރާއްޖޭގެ ކަނޑުގެ ސަރަހައްދުގައިކަން މިނިސްޓްރީގެ ވެސަލް މޮނީޓަރިންގ ސިސްޓަމްއިން ކަށަވަރުވެފައިވާ ކަމަށާ، މިހާދިސާއާ ގުޅިގެން ކޯސްޑްގާޑާއި އުޅަނދުގެ ވެރިފަރާތާއެކު ގާތުން މަސައްކަތް ކުރަމުންދާ ކަމަށެވެ.
ވޮއިސް އަށް މަޢުލޫމާތު ލިބިފައިވާ ގޮތުގައި އަސުރުމާ 3 އަށް އެރި ބޭރުގެ ސިފައިން މިހާރު އެ ދޯނިން ވަނީ ފައިބައިފައެވެ.
Advertisement
This content is created and paid for by advertisers and does not involve Voice Journalists
