ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް އަށް ހަމަލާދީ ޒަހަމްކޮށްލި މައްސަލަ އާއި ގުޅިގެން ދެ މީހަކު ހައްޔަރުކޮށްފިއެވެ.

ޕީޖީ ޝަމީމަށް ދިން ހަމަލާ އާއި ގުޅިގެން ފުލުހުން ގެ ފަރާތުން ބޭއްވި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ މި މައްސަލައިގައި ތުހުމަތުކުރެވޭ ދެ ފަރާތެއް ފުލުހުންގެ ބެލުމުގެ ދަށަށް ގެނެސްފައިވާކަމަށެވެ. 

ޕީޖީ ޝަމީމަށް ހަމަލާދިނީ މޫނު ނިވާކޮށްގެން، ވަރަށް ބޮޑަށް އެއީ ކާކުކަން ނޭނގޭ ގޮތަށް ރޭވިގެން ކަން މިހާތަނަށް ލިބުނު މައުލޫމާތު ތަކުން އެނގޭ ކަމަށް ވެސް ޝުޖާއު ވިދާޅުވިއެވެ. 

މައްސަލައިގެ ރިޕޯޓް ލިބުމާއި ގުޅިގެން މި ހަމަލާގައި އަމަލީ ގޮތުން ބައިވެރި ފަރާތްތައް ހޯދުމަށް އެ އިދާރާގެ ހުރިހާ ވަސީލަތެއް ބޭނުންކުރި ކަމަށާއި، މި ކަން ހިނގިތާ މާގިނަ އިރެއް  ނުވެ މިކަން ކުރެވިގެން ދިޔުމުން މިކަހަލަ ކަމެއް ހިނގީމަ، މިއިން ކޮންމެ ކަމަކީ ވެސް ދިވެހި ފުލުހުންގެ ހިދުމަތުން ވަރަށް ސީރިއަސް ކޮށް ބަލަމުންދާ ކަމެއްކަން އެނގިގެން ދިޔަކަން ޝުޖާއު ފާހަގަކުރެއްވިއެވެ.

ޕީޖީ ޝަމީމަށް ހަމަލާދީފައިވަނީ އިއްޔެގެ ފަތިހުގެ ވަގުތެއްގައި މާލޭގެ މަގުމަތީގައި، ސައިކަލެއްގައި އައި ދެ މީހަކު، ހަތިޔާރެއް ބޭނުންކޮށްގެންނެވެ. މި ހަމަލާ އާއި ގުޅިގެން އެބޭފުޅާ އޭޑީކޭ ގައި ފަރުވާ ހޯއްދެވުމަށްފަހު މިހާރު ވަނީ ގެއަށް ދޫކޮށްލާފައެވެ.

ޕީޖީ ޝަމީމަށް ދިން ހަމަލާގައި އެބޭފުޅާ ގެ ވާއަތްޕުޅުގައި ވަނީ ރެދުލައިފައެވެ. 

މި މައްސަލައާއި ގުޅިގެން  ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު ޢަލީ އިޙުސާން ވަނީ މި މައްސަލައަށް ވަރަށް ބޮޑު އިސްކަމެއް ދީގެން ފުލުހުން ތަހުގީގު ކުރަމުން އަންނަ ކަަމަށް ވިދާޅުވެ، ހަމަލާ ދިން ފަރާތްތައް އިންސާފުގެ ކުރިމައްޗަށް ނެރުއްވާނެ ކަަމުގެ ޔަގީން ކަން ވަޒީރު ވަނީ ދެއްވާފައެވެ.