މި އަހަރުގެ މާޗު މަހުގެ 17 ވަނަ ދުވަހު އޮންނަ މަޖިލިސް އިންތިޚާބަށް ރީރަޖިސްޓަރީ ކުރުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިފިއެވެ.

އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވީ ރަޖިސްޓަރީވުމަށް އެދި ހުށަހަޅާނީ ނިމިދިޔަ ރިޔާސީ އިންތިހާބުގެ ދެވަނަ ބުރުގައި ރަޖިސްޓަރީ ވެފައިވާ ރަށް ނޫން އެހެން ތަނަކަށް ނުވަތަ ރަށަކަށް ރަޖިސްޓަރީވާން އެދިފައިވާ ފަރާތްތައް އެކަނި ކަމަށެވެ.

އޮންލައިން ކޮށް ރީރަޖިސްޓްރީ ފުރާ ފޯމު އީސީ ގެ ވެބައިޓުން ލިބެން ހުންނާނެއެވެ. ފޯމު ފުރަނީ، އޮންލައިންކޮށް ނޫންނަމަ އެ ރަށެއްެ ކައުންސިލް އިދާރާއިން ފޯމު ލިބޭނެއެވެ.

Advertisement

ރީރަޖިސްޓްރީ ކުރުމުގެ ފުރުސަތު ހުޅުވާލާފައިވަނީ މިއަދުގެ މިއަދު ހެނދުނު 8:30 އިން ފެށިގެން މިމަހުގެ ހަތް ވަނަ ދުވަހުގެ ހަވީރު 4:00 އާ ހަމަޔަށެވެ.

އީސީ އިން ވަނީ މަޖިލިސް އިންތިހާބުގައި  ބަހައްޓާ ވޯޓުފޮށީގެ ނަންބަރާއި، ވޯޓުފޮށީގެ ކޯޑާއި، ވޯޓުލާ ސަރަހައްދާއި، ވޯޓުފޮށި ބަހައްޓާ ރަށާއި ތަނުގެ މައުލޫމާތު މިހާރު ވަނީ އާންމުކޮށްފައެވެ. ވޯޓް ލާން ޖެހެނީ ކޮން ފޮއްޓަކަށްތޯ ޔަގީން ކުރުމަށް އިލެކްޝަންސް ކޮމިޝަންގެ ހޮޓްލައިން 1414 ން އަށް ގުޅުމުންވެސް ނުވަތަ މެސެޖް ކޮށްލުމުންވެސް މައުލޫމާތު ސާފުވެގެން ދާނެ ކަމަށް އީސީ އިން ބުނެއެވެ.

 މަޖިލިހުގެ އިންތިހާބުގައި 93 ދާއިރާ އަކަށް ވާދަކުރުމުގެ ފުރުސަތު ވެސް އީސީން މިހާރު ވަނީ ހުޅުވާލައިފައެވެ. މި ފުރުސަތު ހުޅުވާލާފައި ވަނީ މި މަހުގެ 14 ވަނަ ދުވަހުގެ މެންދުރު 2:00 އާ ހަމައަށެވެ. މަޖިލީހުގެ އިންތިހާބަށް ކުރިމަތިލުމަށް އެދޭ މީހުން، ރައްޔިތުންގެ މަޖިލީހުގެ އިންތިހާބަށް ކުރިމަތިލުމަށް އެދޭ ފޯމާއި ތަކެތި ހުށަހަޅަން ޖެހޭނީ އިންތިހާބާ ބެހޭ މަރުކަޒު ނުވަތަ ދަރުބާރުގެ އަށެވެ.