ކޯޓްގައި ހިނގި މައްސަލައަކާއި ގުޅިގެން ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް އަށް ސެކިއުރިޓީ ފޯރުކޮށް ދެވެމުން ދިޔަ ކަމަށް ފުލުހުން ހާމަކޮށްފިއެވެ.
ޕީޖީ ޝަމީމަށް ދިން ހަމަލާ އާއި ގުޅޭ މައުލޫމާތު ހިއްސާކުރުމަށް ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ކޮމިޝަނަރު އޮފް ޕޮލިސް އަލީ ޝުޖާއު ވިދާޅުވީ ތަންކޮޅެއް ކުރީން ޕީޖީ ޝަމީމަށް ސެކިއުރިޓީ ފޯރުކޮށް ދީފައިވާ ކަމަށެވެ. ޝުޖާއު ވިދާޅުވީ އޭރު ސެކިއުރިޓީ ފޯރުކޮށްދިނީ އެ ދުވަސްވަރު ކޯޓްގައި ހިނގި މައްސަލައަކާއި ގުޅިގެން އޭރު ފުލުހުން ހެދި ތްރެޓް އެސެސްމަންޓަކާއި ގުޅިގެން ކަމަށެވެ.
ސީޕީ ޝުޖާއު މިފަދައިން ވިދާޅުވިޔަސް، ޕީޖީ ޝަމީމަށް އޭރު ސެކިއުރިޓީ ފޯރުކޮށްދިނީ ކޮން ކަމަކާއި ގުޅިގެން ނުވަތަ ކޮން ދުވަސްވަރެއްގައި ކަން ހާމަ ކުރައްވާފައެއް ނުވެއެވެ.
"އަޅުގަނޑުމެން ތަންކޮޅެއް ކުރީގައި ޕީޖީ... އެ ދުވަސްވަރު ކޯޓްގައި ހިނގި މައްސަލައަކާއި ގުޅިގެން އޭރު އަޅުގަނޑުމެން ހެދި ތްރެޓް އެސެސްމަންޓެއް ގައި ޕީޖީ އަށް ސެކިއުރިޓީ ފޯރުކޮށް ދެވެމުން ދިޔަ. އެހެން ނަމަވެސް އެއަށް ފަހު އެކަން ނިމުނީމަ ސެކިއުރިޓީ ފޯރުކޮށް ދިނުން ހުއްޓާލާފައި ވަނީ"
ޝުޖާއު ވިދާޅުވިއެވެ.
މީގެ އިތުރުންވެސް ޝުޖާއު ވިދާޅުވީ މި މައްސަލައިގައި ތުހުމަތު ކުރެވޭ ދެ މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، އެމީހުން ޕީޖީ ޝަމީމަށް ހަމަލާދީފައިވަނީ މޫނު ފޮރުވައިގެން ދުރާލާ ރާވައިގެން ކަމަށެވެ.
އިއްޔެގެ ހެނދުނުގެ ވަގުތެއްގައި މާލޭގައި ޝަމީމަށް އިއްޔެ ހަމަލާދިނުމާއި ގުޅިގެން އެބޭފުޅާގެ ވާއަތްޕުޅުގައި ވަނީ ރެނދުލާފައެވެ. އޭޑީކޭގައި ލިބުނު ޒަހަމްތަކަށް ފަރުވާ ދިނުމަށް މިހާރު އެބޭފުޅާ ވަނީ ގެޔަށް ދޫކޮށްލާފައެވެ.
Advertisement
This content is created and paid for by advertisers and does not involve Voice Journalists
