ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިހާބުގައި މޯލްޑިވިއަން ޑިމޮކްރެޓިކް ޕާރޓީ އެމްޑީޕީން ހުރިހާ ދާއިރާއަކަށް ވެސް ވާދަކުރާނެކަމަށް އެޕާރޓީން ބުނެފިއެވެ.

މިގޮތަށް އެޕާރޓީ ބުނެފައިވަނީ ކުރިއަށް އޮތް ރައްޔިތުން މަޖިލިހުގެ އިންތިހާބަށް އެޕާރޓީން މެމްބަރުން ކަނޑައެޅުމަށް އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ޕްރައިމަރީ އިންތިހާބާއި ބެހޭގޮތުން މަޢުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

މި ބައްދަލުވުމުގައި މާފަންނު ހުޅަނގު ދާއިރާގެ މެމްބަރ މުޙައްމަދު ފަލާޙު ވިދާޅުވީ ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި އެމްޑީޕީން އިންތިހާބީ ހުރިހާ ދާއިރާއަކަށްވެސް ވާދަކުރާނެ ކަމަށެވެ. މިހާތަނަށް އެޕާޓީން ކުރިމަތިލާނެކަން އިއުލާނުކޮށްފައި ނުވާ ފަސް ދާއިރާއަށް ވެސް މިހާރު ބައެއް ފަރާތްތަކުން ޝަޢުޤުވެރިކަން ފާޅުކޮށްފައިވާ ކަމަށެވެ.

Advertisement

"އަޅުގަނޑުމެންގެ ތެރެއިން ކެންޑިޑޭޓުން ހަމަޖެހެމުން އެބަދޭ މިހާރު، އަޅުގަނޑުމެން ޕްރައިމަރީއަށް އިއުލާނު ކުރުމުން ނަން ހުށަނާޅާ ފަސްދާއިރާ އެއީ، އަޅުގަނޑުމެން ހުރިހާ ދާއިރާއަކުންވެސް ހަމަ ވާދަކުރާނެ އިނގޭތޯ" ފަލާޙް ވިދާޅުވިއެވެ.

މިއަދުގެ މި ނޫސްވެރިންގެ ބައްދަލުވުމުގައި އެމްޑީޕީން އިތުރަށް ބުނި ގޮތުގައި އެޕާރޓީގެ ޕްރައިމަރީ އޮންނާނީ ޖުމުލަ 40 ދާޢިރާއެއްގައެވެ. ބާކީ އޮތް އަނެއް 53 ދާއިރާއަށް އެންމެ މެމްބަރަކު ކުރިމަތި ލައިފައިވާތީ އެދާޢިރާގައި ޕްރައިމަރީ ބާއްވާކަށް ނުޖެހެއެވެ.

"އަޅުގަނޑުމެންގެ ޕްރައިމަރީ އޮންނާނީ 40 ދާއިރާއެއްގައި ، މިފަހަރު މަޖިލިހުން ދާއިރާތައް ކަނޑައެޅިއިރު  93 ދާއިރާއެއް ކަނޑައަޅާފައިވޭ، އެހެންކަމުން ބާކީ އޮތް 53 ދާއިރާއަށް ކުރިމަތިލައިފައިވަނީ ހަމައެންމެ ބޭފުޅެއް ، އެހެންވީމަ އަޅުގަނޑުމެންގެ ޕްރައިމަރީ އޮންނާނީ 40 ދާއިރާއެއްގައި" އެމްޕީ ފަލާޙް ވިދާޅުވިއެވެ.

އެމްޑީޕީގެ ޕްރައިމަރީ ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ.