ހަތިޔާރުއެޅި އިންޑިއާ ސިފައިން ރާއްޖެއަރައި މަސްވެރިންނާއި ކުރިމަތިލި މައްސަލާގައި، ކަން ހިނގައިދިޔަ ގޮތް ލިޔުމުން ފޮނުވުމަށް ދިވެހި ސަރުކާރުން އިންޑިއާގައި އެދިއްޖެއެވެ. 

އެގޮތުން އިންޑިޔާ ސިފައިން ރާއްޖޭގެ ކަނޑުގެ އިގްތިސޯދީ ސަރަހައްދަށް ހުއްދަ ހޯދުމެއްނެތި، ވަދެ ހަތިޔާރާއެކު ދިވެހި މަސްދޯނި ތަކަށް އެރި މައްސަލާގައި ކަން ހިނގައިދިޔަ ގޮތް ލިޔުމުން ކިޔައި ދިނުމަށް، އިންޑިއާއަށް އަންގާފައިވާ ކަމަށް ސަރުކާރުގެ އޮފިޝަލަކު "ވޮއިސް" އަށް ވަނީ ކަށަވަރު ކޮށްދެއްވާފައެވެ. 

އިންޑިއާ ސިފައިން ދިވެހި 3 މަސްދޯންޏަކަށް އެރި މައްސަލަ ސަރުކާރުންނާއި އެމްއެންޑީއެފްއިން ތަހުގީގު އަންނަ އިރު، އިންޑިޔާ ސިފައިން ރާއްޖޭގެ ދޯނި ތަކަށް އެރި ސަރަހައްދުގައި ކޯސްޓްގާޑް ޝިޕް ޝަހީދުއަލީ ޕެޓްރޯލްކޮށް ބަލަހައްޓަމުންދާ ކަމަށް އެމްއެންޑީއެފްއިން ބުނެފައިވެއެވެ. 

31 ޖަނަވަރީ ވީ ބުދަދުވަހު ހަވީރު، ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުން ދަނިކޮށް ދިވެހި ތިން މަސް ދޯންޏަކަށް އިންޑިޔާ ސިފައިން ވަނީ އަރާފައެވެ. އެގޮތުން ހަތިޔާރު އެޅި ސިފައިން އަރާފައި ވަނީ އަސުރުމާ 3، ނިރު 7 އަދި މާހޯރަ 3 ދޯންޏަށް ކަމަށް ބޮޑު ކަންނެލި މަސްވެރިންގެ ޔޫނިއަން އިން ވަނީ މައުލޫމާތު ދީފައެވެ. 

އަދި އިންޑިޔާ ސިފައިން އެތަނުން އެއް ދޯންޏަށް އަރައި ތިބި ވީޑިއޯ ވެސް މިއަދުގެ ވަގުތެއްގައި ބޮޑު ކަންނެލި މަސްވެރިންގެ ޔޫނިއަންއިން މީޑީއާގައި ހިއްސާ ކޮށްފައި ވާއިރު، އެ ވީޑިއޯއިން ފެންނަނީ ބޭރުގެ ސިފައިންގެ ދެ މީހަކު ދިވެހި ދޯންޏެއްގެ މަތީބައިގައި ހަތިޔާރާއެކު ތިބޭ މަންޒަރެވެ.

އަދި އެ ވީޑިއޯ ނެގި މީހާ ބުނެފައިވާގޮތުން، ސިފައިން ދޯންޏަށް އަރައި، އެ ދޯނީގައި ތިބި އެންމެން ދޯނީގެ ފަހަތަށް ގެންގޮސް ބައިތިއްބާފައެވެ.

އެ ދެ ސިފައިންގެ އިތުރުން، 5 ވަރަކަށް ސިފައިން ހަތިޔާރާއެކު އެ ދޯނީގައި ތިބި މަންޒަރުވެސް މީޑިއޯ އަކުން ފެނެއެވެ. 

މީގެ އިތުރުން ވީޑިއޯއިން ފެންނަ ގޮތުގައި ދޯނީގެ ކައިރީގައި އިތުރު ދިވެހި ދެ މަސް ދޯންޏާއި އިންޑިއާ ސިފައިންގެ ދެ މަނަވަރު ވެސް ގާތްކޮށްފައި އޮތެވެ. 

އެގޮތުން ވީޑިއޯގައި ސާފުކޮށް ކައިރިން ފެންނަ މަނަވަރަކީ "އަރިޔަމަން" ނަމަކަށް ކިޔާ، އިންޑިއާގެ ކޯސްޓްގާޑުގެ މަނަވަރެކެވެ.