ދިވެހިރާއްޖޭގައި ތިބި އިންޑިޔާ ސިފައިން ބޭލުމަށާ، އަދި ރާއްޖެއާއި އިންޑިއާއިން މަޝްވަރާކުރަން ޖެހޭ އެހެނިހެން މުހިންމު ކަންކަމާ ގުޅިގެން ދެ ޤައުމުގެ އިސް އޮފިޝަލުން ބައިވެރިވާ ހައި ލެވެލް ކޯ ގްރޫޕުގެ ދެ ވަނަ ބައްދަލުވުުން އިންޑިއާގެ ވެރިރަށް ނިއު ދިއްލީގައި ފަށައިފިއެވެ.
މި ކަން ހާމަކޮށް ފޮރިން މިނިސްޓްރީން ނެރުނު ނޫސް ބަޔާނެއްގައި ބުނީ އެ ބައްދަލުވުމަކީ ރައީސް ޑރ. މުޙައްމަދު މުޢިއްޒު އިންޑިއާގެ ބޮޑުވަޒީރާއެކު މިދިޔަ އަހަރު ޑިސެމްބަރު މަހު ދުބާއީގައި ބޭއްވެވި ބައްދަލުކުރެއްވުމުގައި ދެ ބޭފުޅުން އެއްބަސްވެވަޑައިގަތް ގޮތަށް އެކުލަވައިލާފައިވާ ހައި ލެވެލް ކޯ ގްރޫޕުގެ ބައްދަލުވުން ތަކެއް ކަމަށެވެ.
ހައި ލެވެލް ކޯ ގްރޫޕުގެ ފުރަތަމަ ބައްދަލުވުން ބާއްވާފައި ވަނީ މިދިޔަ މަހުގެ 14ވަނަ ދުވަހު ރާއްޖޭގެ ޚާރިޖީ ވުޒާރާގައެވެ.
އެ ބައްދަލުވުމާއި ގުޅޭގޮތުން މަޢުލޫމާތު ދެމުން ފޮރިން މިނިސްޓްރީން އެދުވަހު ބުނީ، އިންޑިއާގެ ސިފައިން ރާއްޖެ އިން ގެންދިއުމުގެ މަސައްކަތް "ފާސްޓް ޓްރެކް" ގައި ކުރިއަށް ގެންދަން ދެ ޤައުމުން ވެސް އެއްބަސްވުމަކަށް އާދެވިފައިވާ ކަމަށެވެ.
އަދި ރާއްޖެ އާއި އިންޑިއާގެ މަސްލަހަތު ހިމެނޭ ކަންކަމާ ގުޅޭ ގޮތުން ފުޅާދާއިރާއެއްގައި މަޝްވަރާ ކުރެވުނު ކަމަށާއި ގުޅުން އިތުރަށް ބަދަހި ކުރުމަށް ބޭނުންވާކަން، ދެ ގައުމުން ވެސް ބައްދަލުވުމުގައި ހާމަކޮށްފައިވާ ކަމަށް ބުނެފައިވެއެވެ.
ހަމަ އެހެންމެ، އެ ބައްދަލުވުމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ހުށަހެޅުއްވި ކަރުދާހުގައި ރާއްޖޭގައި ތިބި އިންޑިއާ ސިފައިން އަންނަ މަހުގެ 15ވަނަ ދުވަހުގެ ކުރިން ރާއްޖެއިން ފޭބުމަށް ދިވެހި ސަރުކާރުން އެދިފައިވާ ކަންވެސް ސަރުކާރުން ފާހަގަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
