ކުރިއަށް އޮތް 20 ވަނަ ރައްޔިތުންގެ މަޖިލިހަށް މޯލްޑިވިއަން ޑިމޮކްރެޓް ޕާޓީ އެމްޑީޕީން ވާދަކުރާނެ ފަރާތްތައް ކަނޑައެޅުމަށް އެ ޕާޓީން ބޭއްވުމަށް ހަމަޖެހިފައިވާ ޕްރައިމަރީ މިއަދުގެ ހެދުނު 9.00 ގައި ފެށިއްޖެއެވެ.

މިއަދު މި ބާއްވާ އެމްޑީޕީގެ ޕްރައިމަރީ ކުރިއަށް ގެންދިއުމަށް ހަމަޖެހިފައިވަނީ 40 ދާޢިރާއެއްގައި ކަމަށް އެޕާޓީން މަޢުލޫމާތު ދެއްވައެވެ.  އެގޮތުން 40 ދާއިރާއަށް 149 ކެންޑިޑޭޓުން ވާދަކުރާއިރު 95 ރަށެއްގައި ވޯޓު ފޮށި ވަނީ ބަހައްޓާފައި ވެއެވެ.

އޭގެ އިތުރުން މާލޭގައި 27 ވޯޓު ފޮށި ވަނީ ބަހައްޓާފައެވެ. މާލޭގެ ފޮށިތައް ޖަމާލުއްދީން ސްކޫލާއި މަޖީދިއްޔާ ސްކޫލުގައި ބަހައްޓާފައިވާއިރު ހުޅުމާލޭގައި ވޯޓު ފޮށި ބަހައްޓާފައިވަނީ ކާމިލް ދީދީ ޕްރީ ސްކޫލާއި މުޙައްމަދު ޤާސިމް ޕްރީސްކޫލުގައެވެ

އެމްޑީޕީން ބުނެފައިވާ ގޮތުގައި މަޖިލިހަށް މިފަހަރު އިންތިހާބު ކުރަން ހަމަޖެހިފައިވާ 93 ދާއިރާއަށް ވެސް އެޕާޓީން ވާދަކުރާނެއެވެ. އޭގެ ތެރެއިން އިންތިހާބަކާ ނުލައި 53 ދާއިރާއަކަށް މިހާރުވަނީ އެ ޕާޓީން ވާދަކުރާނެ ފަރާތްތައް ކަނަޑއެޅިފައެވެ. މި 53 ދާއިރާއަކީ ޕްރައިމަރީ އަށް އިއުލާނު ކުރުމުން  އެންމެ ކެންޑިޑޭޓެއް ކުރިމަތިލައިފައިވާ ދާޢިރާތައް ކަމަށް އެމްޑީޕީން މަޢުލޫމާތު ދެއެވެ.

މިއަދުގެ މި ޕްރައިމަރީގެ ވޯޓްލުން ކުރިއަށް ގެންދިއުމަށް ހަމަޖެހިފައިވަނީ ހެދުނު 9.00 ން ފެށިގެން ހަވީރު 4.00 އަށެވެ. އަދި ޕަރައިމަރީ އާއި ގުޅޭ ޝަކުވާ ބަލައިގަތުމަށް ހަމަޖެހިފައި ވަނީ މިއަދުގެ ހެނދުނު 09:00 ން ފެށިގެން ހޯމަ ދުވަހުގެ ހަވީރު 4:00 އަށް ކަމަށްވެސް އެ ޕާޓީން ބުނެފައި ވެއެވެ.

މިއަދު ވޯޓްގެ ވަގުތީ ނަތީޖާތައް ވޯޓްލައި ނިމުމުން ވޯޓްލާ މަރުކަޒުތަކުގައި އިއުލާނު ކުރެވިގެންދާނެކަމަށްވެސް އެމްޑީޕީން ބުނެއެވެ.