މި އަހަރުގެ މާޗް މަހުގެ 17 ވަނަ ދުވަހު އޮންނަ 20 ވަނަ ރައްޔިތުންގެ މަޖިލީހަށް މެމްބަރުން ހޮވުމަށް ބާއްވާ އިންތިހާބުގައި ވާދަކުރުމަށް މިހާތަނަށް ލިބުނީ ދެ ހުށައެޅުން ކަމަށް އިލެކްޝަން ކޮމިޝަން (އީސީ) އިން ހާމަކޮށްފިއެވެ.

އިލެކްޝަން ކޮމިޝަންގެ ނައިބު ރައީސް އިސްމާއީލް ހަބީބް ވިދާޅުވީ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް ހުޅުވާލިތާ 4 ދުވަސް ވެފައިވާއިރު މިހާތަނަށް އެއިދާރާއަށް ލިބިފައިވަނީ ދެ ހުށަހެޅުން ކަމަށެވެ.

އެއީ ގަމު ދާއިރާ އަށާއި، ނިލަންދޫ ދާއިރާއަށް އަމިއްލަގޮތުން ކުރިމަތިލެއްވި ދެ ކެންޑިޑޭޓެއްގެ ދެ ހުށަހެޅުން ކަމަށާއި އެ ދެ ހުށައެޅުންވެސް އީސީ އިން ބަލައިގަނެ، އެ ދެފަރާތަށް ވެސް އިދާރާއިން ޖަވާބުދީފައި ވާނެ ކަމަށް ވެސް ހަބީބް ވިދާޅުވިއެވެ.

ރައްޔިތުން މަޖިލީހުގައި ވާދަކުރުމަށް އެދި ފޯމު ހުށައެޅުމަށް ހުޅުވާލާފައިވަނީ މި މަހުގެ 14 ވަނަ ދުވަހުގެ މެންދުރު 2:00 އާ ހަމައަށެވެ.  ފޯމު ބަލައިގަތުމަށް ހަމަޖެހިފައިވަނީ ހުކުރުދުވަސް ފިޔަވައި ކޮންމެ ދުވަހަކު ހެނދުނު 9:00 ން މެންދުރުފަހު 2:00 އަށެވެ. ހުކުރު ދުވަހު ފޯމު ބަލައިގަންނާނީ މެންދުރުފަހު 2:00 ން ހަވީރު 4:00 އަށެވެ. ފޯމާއި ތަކެތި ބަލައިގަތުން ކުރިއަށްދާނީ  ދަރުބާރުގޭގެ ރަންނަބަނޑޭރި މާލަމުގައެވެ.

ހަބީބް މިފަދައިން ވިދާޅުވެފައިވާއިރު، މަޖިލިސް އިންތިހާބުގެ ޕްރައިމަރީތައް ޕާޓީތަކުން ބާއްވަމުންދާކަން ފާހަގަ ކޮށްލެވެއެވެ. މިގޮތުން ޕީޕީއެމް/ޕީއެންސީ ކޯލިޝަނުގެ ފަރާތުން މަޖިލީހަށް ވާދަކުރާ ފަރާތްތައް ހޮވުމަށް މިދިޔަ މަހުގެ 27 ވަނަ ދުވަހު އިންތިހާބެއް ބާއްވާފައިވާއިރު، އެމްޑީޕީގެ މަޖިލިސް ޕްރައިމަރީ އަށް ވޯޓުލުން މިއަދު ހެނދުނު 9 އިން ހަވީރު 4 އަށް ކުރިއަށް އެބަދެއެވެ.

މަޖިލީހުގެ އިންތިހާބުގައި 93 ދާއިރާ އަކަށް ވާދަކުރުމުގެ ފުރުސަތު އީސީން ވަނީ ހުޅުވާލައިފައެވެ.