ރައްޔިތުންގެ މަޖިލިސް އިންތިހާބުގައި ވާދަކުރާ ކެނޑިޑޭޓުންގެ ފޮޓޯ އާއި ލޯގޯ ވޯޓު ކަރުދާހުގައި ޖަހަން އިލެކްޝަން ކޮމިޝަން (އީސީ) އިން ނިންމައިފިއެވެ.

އީސީގެ ނައިބު ރައީސް އިސްމާއިލް ހަބީބް ވިދާޅުވީ މިފަދައިން އެ ކޮމިޝަނުން ނިންމީ މިދިޔަ ހަފްތާގައި ކަމަށެވެ. 

މިގޮތުން ހަބީބް ވިދާޅުވީ ސިޔާސީ ޕާޓީ ތަކުގެ ފަރާތުން ކުރިމަތިލާ ކެނޑިޑޭޓުންގެ ލޯގޯ އަކަށް ވަނީ އެ ކެނޑިޑޭޓަކު ނިސްބަތްވާ ޕާޓީއެއްގެ ލޯގޯ ކަމަށެވެ. އަދި އަމިއްލަގޮތުން ވާދަކުރައްވާ ކެންޑިޑޭޓުންނަށް ވޯޓު ކަރުދާހުގައި ޖަހާނީ އީސީން ފާސްކޮށްފައިވާ، އެ ކެންޑިޑޭޓަކު ހުށަހަޅާ ލޯގޯ އެއް ކަމަށާއި އެއް ކެނޑިޑޭޓަކު ހުށައަޅާ ލޯގޯ އެއް އެއް އަނެއް ކެންޑިޑޭޓަކަށް ބޭނުމެއް ނުކުރެވޭނެ ކަމަށް ވެސް ހަބީބް ވިދާޅުވިއެވެ. ދެ ކެނޑިޑޭޓަކު އެއް ލޯގޯ އެއް ހުށައަަޅައިފި ހާލަތެއްގައި, ފުރުސަތުދެވޭނީ އެންމެ ފުރަތަމަ އެ ލޯގޯ ހުށައެޅި ކެނޑިޑޭޓަށް ކަމަށް ވެސް އެބޭފުޅާ ވިދާޅުވިއެވެ.

އީސީން ވަނީ މި އަހަރުގެ މާޗު މަހުގެ 17 ވަނަ ދުވަހު  އޮންނަ 20 ވަނަ ރައްޔިތުންގެ މަޖިލީހަށް މެމްބަރުން ހޮވުމަށް ބާއްވާ އިންތިހާބުގައި ވާދަކުރުމަށް އެދި ފޯމު ހުށައެޅުމަށް ހުޅުވާލާފައެވެ. އެ އިދާރާއިން ފޯމު ބަލައިގަންނާނީ މި މަހުގެ 14 ވަނަ ދުވަހުގެ މެންދުރު 2:00 އާ ހަމައަށެވެ.

ފޯމު ބަލައިގަތުމަށް ހަމަޖެހިފައިވަނީ ހުކުރުދުވަސް ފިޔަވައި ކޮންމެ ދުވަހަކު ހެނދުނު 9:00 ން މެންދުރުފަހު 2:00 އަށެވެ. ހުކުރު ދުވަހު ފޯމު ބަލައިގަންނާނީ މެންދުރުފަހު 2:00 ން ހަވީރު 4:00 އަށެވެ. ފޯމާއި ތަކެތި ބަލައިގަތުން ކުރިއަށްދާނީ ދަރުބާރުގޭގެ ރަންނަބަނޑޭރި މާލަމުގައެވެ.