ކުރިއަށް އޮތް 20 ވަނަ ރައްޔިތުންގެ މަޖިލިހުގެ މެޖޯރިޓީ މޯލްޑިވިއަން ޑިމޮކްރެޓިކް ޕާޓީ އެމްޑީޕީއަށް ލިބޭ މަންޒަރު ފެނިވަޑައި ގަންނަވާކަމަށް އެޕާޓީގެ ވަގުތީ ރައީސް އަދި ނިމިދިޔަ ސަރުކާރުގެ ރައީސް އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މި ފަދައިން ވިދާޅުވެފައި ވަނީ މިއަދު އެމްޑީޕީން ކުރިއަށް ގެންދާ މަޖިލިސް ޕްރައިމަރީގެ ވޯޓްލުން ކުރިއަށްދާގޮތް ބައްލަވާ ލެއްވުމަށް ފަހު ނޫސްވެރިންނާއި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ ޕާރޓީގެ ޕްރައިމަރީ ނިމުމާއިއެކު ކުރިއަށް އޮތް 20 ވަނަ ރައްޔިތުން މަޖިލިހަށް އެމްޑީޕީން ކެންޕެއިން ފަށައިގަންނާނެ ކަމަށާއި، އެޕާޓީގެ އަމާޒަކީ މަޖިލިސް އިންތިޚާބުގައި މަޖިލީހުގެ އަޣުލަބިއްޔަތު ހޯދުން ކަމަށެވެ. އަދި މަޖިލީހުގެ އަޣުލަބިއްޔަތު އެ ޕާޓީއަށް ކާމިޔާބުވާ މަންޒަރު ފެނިވަޑައިގަންނަވާ ކަމަށް ރައީސް ޞާލިޙް ވިދާޅުވިއެވެ.

Advertisement

ރައީސް ޞަލިހް އިތުރަށް ފާހަގަ ކުރެއްވި ގޮތުގައި އެމްޑީޕީން ޕްރައިމަރީ ނުބާއްވާ ދާއިރާތަކަށް ކަންޑިޑޭޓުން ކަނޑައެޅިގެން ދިޔައީ ޕާރޓީގެ ލީޑަރޝިޕްގެ މަޝްވަފާރާ އާއި އެކު ބައެއް ދާއިރާތަކަށް ވާދަކުރުމަށް ޝައުޤުވެރިކަން ފާޅުކުރެއްވި ބައެއްފަރާތްތަކުން އެފަރާތްތަކުގެ ނަން އަބުރާ ގެންދެވުމުން ކަމަށެވެ. ރައީސް ޞާލިޙް ފާހަގަ ކުރެއްވި ގޮތުގައި އެއީ ވަރަށް ރަނގަޅަށް ވެގެން ދިޔަ ކަމެކެވެ.

އެމްޑީޕީން ބުނެފައިވާ ގޮތުގައި މަޖިލިހަށް މިފަހަރު އިންތިހާބު ކުރަން ހަމަޖެހިފައިވާ 93 ދާއިރާއަށް ވެސް އެޕާޓީން ވާދަކުރާނެއެވެ. އޭގެ ތެރެއިން އިންތިހާބަކާ ނުލައި 53 ދާއިރާއަކަށް މިހާރުވަނީ އެ ޕާޓީން ވާދަކުރާނެ ފަރާތްތައް ކަނަޑއެޅިފައެވެ. އެހެންކަމުން މިއަދުގެ ޕްރައިމަރީ ބާއްވަނީ 40 ދާއިރާއެއްގައެވެ. އަދި މި ދާއިރާތަކަށް 149 ކެންޑިޑޭޓުން ވާދަކުރާއިރު 95 ރަށެއްގައި ވޯޓު ފޮށި ވަނީ ބަހައްޓާފައި ވެއެވެ.

ޕްރައިމަރީގެ ވަގުތީ ނަތީޖާ މިރޭ ހާމަކުރެވިގެންދާނެކަމަށް އެމްޑީޕީން މަޢުލޫމާތު ދެއެވެ.