އިއްޔެ ކުރިއަށް ދިޔަ އެމްޑީޕީގެ މަޖިލިސް ޕްރައިމަރީގައި އެ ޕާޓީގެ ތަރުޖަމާނު އަނަސް އަބްދުއްސައްތާރު ލަދުވެތި ނަތީޖާއަކުން ބަލިވެއްޖެ އެވެ. 

މި އިންތިހާބުގައި އަނަސް ވާދަކޮށްފައި ވަނީ ވިލިމާލޭ ދާއީރާ އަށެވެ. އެ ދާއިރާގެ އެމްޑީޕީ ޕްރައިމަރީގައި އަނަސް އާއި ވާދަކުރީ އަބްދުލް މަޖީދު މުޝައްރަފް އަބްދުލް ރައްޒާޤެވެ. 

އަބަދުލް މަޖީދު އަނަސްގެ މައްޗަށް ކުރި ހޯދާފައި ވަނީ 94 ވޯޓުގެ ތަފާތަކުންނެވެ. އެގޮތުން 147 ވޯޓާއެކު، 73.50 އިންސައްތަ ވޯޓު އަބްދުލް މަޖީދަށް ލިބުނު އިރު، އަނަސް އަށް ލިބުނީ 53 ވޯޓެވެ. އެއީ ވޯޓުލީ މީހުންގެ 26.5 އިންސައްތަ އެވެ. 

Advertisement

އިއްޔެގެ ޕްރައިމަރީއިން އަނަސްގެ އިތުރުން އެމްޑީޕީގައި އިސް ކޮށް ހަރަކާތްތެރިވާ، މިހާރުވެސް ޕާޓީ ޓިކެޓްގައި، މަޖިލިސް ތަމްސީލުކުރައްވާ ބައެއް ފަރާތްތަކަށްވެސް ވަނީ ނާކާމިޔާބީއާ ކުރިމަތިލާން ޖެހިފައެވެ.

އެގޮތުން ކެޔޮދޫ ދާއިރާގެ މަޖިލިސް މެންބަރު، ހުސައިން ގާސިމާއި، އައްޑޫމީދޫ ދާއިރާގެ މިހާރުގެ މެންބަރު ރޮޒައިނާ އާދަމް އަދި ކެލާ ދާއިރާގެ މެންބަރު އިބްރާހިމް ޝަރީފަށް އެމްޑީޕީ ޓިކެޓް ނުލިބުނެވެ.

ކުރިއަށް އޮތް މަޖިލީހުގައި ހުރިހާ ދާއިރާއަށް އެމްޑީޕީން ވާދަކުރުމަށް އެ ޕާޓީން ވަނީ ނިންމާފައެވެ. ނަމަވެސް، ބައެއް ދާއީރާ ތަކަށް އެންމެ ކެންޑިޑޭޓެއް ވާދަކުރެއްވުމުން ޓިކެޓް ޔަގީން ވެފައި ވުމުން، އިއްޔެ ބޭއްވީ 40 ދާއިރާއެއްގެ ޕްރައިމެރީ އެވެ. އެ ދާއިރާތަކަށް 149 ކެންޑިޑޭޓުން ވާދަ ކުރިއިރު، 25،325 މީހަކަށް މިއަދުގެ އިންތިހާބުގައި ވޯޓުލުމުގެ ހައްގު ލިބުނެވެ.

މަޖިލިސް އިންތިހާބު ބާއްވަން އިލެކްޝަން ކޮމިޝަނުން ނިންމީ އަންނަ މާރޗްމަހުގައެވެ. އިންތިޚާބުގައި ވާދަކުރުމުގެ ފުރުސަތު މި މަހުގެ 14 ވަނަ ދުވަހުގެ މެންދުރު 2:00 އާ ހަމައަށް ވަނީ ހުޅުވާލެވިފައެވެ.