ޑޮކްޓަރުގެ ފަރުވާކަމުން، ނުވަތަ އެހެން މީހަކު ކުޅަ ޢަމަލެއްގެ ސަބަބުން، މާބަނޑު އަންހެނެއްގެ ބަނޑުގައިވާ ދަރި މަރުވެއްޖެ ނަމަ މަރުގެ ދިޔަ ދީ ކައްފާރާ ވެސް ދޭންޖެހޭނެ ކަމަށް ބުނެފިއެވެ.
އިސްލާމީ ފަތުވާދޭ އެންމެ މަތީ މަޖިލީހުން މިއަދު ނެރުނު ފަރުވާގައި ބުނެފައިވާގޮތުން، ޑޮކްޓަރުގެ ފަރުވާކަމުން، ނުވަތަ އެހެން މީހަކު ކުޅަ ޢަމަލެއްގެ ސަބަބުން، މާބަނޑު އަންހެނެއްގެ ބަނޑުގައިވާ ދަރި މަރުވެއްޖެ ނަމަ ނުވަތަ އެފަދަ އަމަލެއްގެ ސަބަބުން، މާބަނޑު އަންހެނާގެ ބަނޑުގައިވާ ދަރި ވެއްޓުނު އިރު މަރުވެފައިވާ ކަމުގައިވާ ނަމަ ދިޔަ ދިނުމަށްފަހު ކައްފާރާ ދޭންޖެހޭ ކަމަށެވެ.
އެގޮތުން، އެފަދަ ހާލަތެއްގައި، ކަން ކުރުމަށް އިސްލާމީ ޝަރީއަތުގައި އޮންނަނީ އެކަން ކުޅަމީހާ އެކުއްޖާގެ ވާރުތަވެރިންނަށް ޣުއްރާއެއްގެ މިންވަރު ދިޔައިގެ ގޮތުގައި ދިނުމާއި، ކައްފާރާދިނުން ކަމަށް ބުނެފައިވެއެވެ.
ޣުއްރާއަކީ، މިނިވަނެއްގެ ދިޔައިގެ ދިހަ ބައިކުޅަ އެއްބައިގެ ދެބައިކުޅަ އެއްބައެވެ. އެއީ ޖަމަލުންނަމަ ފަސް ޖަމަލެވެ. ދީނާރުން ނަމަ ފަންސާސް ދީނާރެވެ. އަދި އެއީ ޚާލިޞް ރަނުގެ 212.5 ގުރާމެވެ. ދިރުހަމުން ނަމަ 500 ދިރުހަމެވެ.
އެއީ ކީރިތި ރަސޫލާ ގެ އަމަލުފުޅުންނާއި، ބަސްފުޅުންނާއި ނިޔާފުޅުން، ސާބިތުވާ ގޮތް ކަމަށް ފަތުވާގަައި ވެއެވެ.
ކައްފާރާއަކީ، މުއުމިން އަޅަކު މިނިވަންކުރުމެވެ. މިނިވަންކުރާނޭ މުއުމިނަކު ނުލިބިއްޖެ ނަމަ، ވިދިވިދިގެން ހަނދުމަހުގެ ދެ މަސް ދުވަހު ރޯދަހިފުމެވެ. ފަތުވާ ކޮމިޓީން ބުނި، މި ހުކުމް ސާބިތު ވަނީ ގުރުޢާނުގެ އައްނިސާ ސޫރަތުގެ 92 ވަނަ އާޔަތުން ކަމަށެވެ.
Advertisement
This content is created and paid for by advertisers and does not involve Voice Journalists
